BMT Təhlükəsizlik Şurası İran sanksiyaları ilə bağlı brifinq keçirib

SON XƏBƏRLƏR

BMT Təhlükəsizlik Şurası İran sanksiyaları ilə bağlı brifinq keçirib - Çin və Rusiya İranı qorudu

2026.09.10, 20:17

BMT Təhlükəsizlik Şurası cümə axşamı İranın nüvə və ballistik raket proqramlarına qarşı BMT sanksiyalarına nəzarət edən komitə ilə bağlı brifinq keçirib. Fransa, Almaniya və Böyük Britaniya 2025-ci ilin avqustunda nüvə sazişində nəzərdə tutulan “tətik” mexanizmini işə salaraq bu sanksiyaların bərpasına təşəbbüs göstərmişdi.

Gunaz.tv

İclasda komitənin rəsmi hesabatı təqdim edilməyib. Buna səbəb Çin və Rusiyanın hesabatın qəbul edilməsinə qarşı çıxması və “tətik” mexanizminin hüquqi qüvvəsini tanımamasıdır.

Komitə 2006-cı ildə 1737 saylı qətnamə əsasında yaradılıb və Təhlükəsizlik Şurasına hər 90 gündən bir hesabat təqdim etməli idi. Onun fəaliyyəti 2015-ci il nüvə sazişindən sonra əvvəlki BMT sanksiyalarına dair qətnamələrin dayandırılması ilə faktiki olaraq sona çatmışdı.

Rusiyanın nümayəndəsi Anna Evstiqneyeva komitənin fəaliyyətini bərpa etməsi üçün “heç bir əsasın olmadığını” bildirib və 2231 saylı qətnamənin 18 oktyabr 2025-ci ildə qüvvədən düşdüyünü iddia edib.

Çinin nümayəndəsi də komitənin fəaliyyətinin bərpası üçün heç bir əsas olmadığını bildirib. Böyük Britaniya isə 1737 saylı qətnamə də daxil olmaqla, İranla bağlı altı Təhlükəsizlik Şurası qətnaməsinin təxminən bir ildir yenidən qüvvədə olduğunu deyib.

ABŞ nümayəndəsi bildirib ki, 1737 saylı qətnamə və sonrakı qətnamələr komitədən rüblük hesabatlar tələb edir. Lakin Çin və Rusiyanın maneə yaratması səbəbindən belə bir hesabat təqdim edilməyib.

Bəhreynin nümayəndəsi isə İranın ərəb ölkələrinə və gəmilərə hücumlarını pisləyib. O, İranın nüvə məsələsinin diplomatik yolla həlli, gərginliyin azaldılması və regional təhlükəsizliyin gücləndirilməsi istiqamətində səylərə dəstəyini ifadə edib.

GUNAZ.TV

SON XƏBƏRLƏR