“Güney Azərbaycan” Türkiyənin yeni dərsliklərində: Təbriz bu diyarın ürəyi kimi təqdim olunur

SON XƏBƏRLƏR

“Güney Azərbaycan” Türkiyənin yeni dərsliklərində: Təbriz bu diyarın ürəyi kimi təqdim olunur

2026.10.17, 01:30

Gunaz.tv

Türkiyənin Milli Təhsil Nazirliyi yeni tədris vəsaiti olan “Türk Dünyası Mədəniyyət Atlası”nda Güney Azərbaycana xüsusi bölmə ayırıb. Kitabda bu diyar şagirdlərə “Şərqdə bizə ən yaxın qardaş coğrafiyası” kimi təqdim olunur. Nəşr 2026–2027-ci tədris ilində Türkiyə məktəblərində dərsliklərlə birlikdə şagirdlərə təqdim edilib.

Türkiyənin Milli Təhsil Nazirliyinin Orta Təhsil Baş İdarəsi tərəfindən hazırlanan kitabda Təbriz şəhərinin təsviri üzərində iri hərflərlə “Güney Azərbaycan” başlığı yerləşdirilib. Müəlliflər həmin bölmədə yazırlar: “Türk dünyasına səyahətimizin son mərhələsində istiqamətimizi İrana — Güney Azərbaycanın ürəyi olan Təbrizə yönəldirik”.

Kitabda Güney Azərbaycan Türkiyə vətəndaşlarının dil baxımından özlərini yad hiss etmədən səyahət edə biləcəkləri, Azərbaycan türkləri, qaşqaylar və xələclərlə görüşə biləcəkləri bir diyar kimi təsvir olunur.

Nəşrdə “Traktor” futbol klubunun azarkeşlərinə də geniş yer ayrılıb. Azarkeşlərin fotosu ilə yanaşı, müəlliflər Təbriz stadionunda minlərlə insanın toplaşmasına və onların türkcə səsləndirdikləri şüarlara diqqət çəkirlər. Bildirilir ki, Təbrizdə futbol yalnız idman yarışı deyil, həm də ortaq dilin, mədəniyyətin və milli-mədəni mənsubiyyət hissinin təzahürüdür.

Kitabda İran coğrafiyasında türklərin tarixi irsinə də toxunulur. İsfahan Cümə məscidi Səlcuq dövrü memarlığının görkəmli nümunələrindən biri kimi təqdim edilir. YUNESKO-nun Dünya İrsi Siyahısına daxil edilmiş bu abidənin günbəzləri, kərpic eyvanları və türk-islam memarlığı xüsusiyyətləri haqqında məlumat verilir.

Türkiyənin milli təhsil naziri Yusuf Tekin də kitaba yazdığı ön sözdə türk xalqları arasındakı tarixi və mədəni bağları vurğulayaraq şagirdlərə müraciət edir: “Unutmayın ki, xəritələr üzərində çəkilmiş sərhədlər qəlblərdə mövcud olan qədim bağları qıra bilməz”.

“Türk Dünyası Mədəniyyət Atlası: Bilgə və Hakanla Zamanın O Tayına Səyahət” adlı nəşr Türkiyənin “Köklərdən gələcəyə” şüarı ilə həyata keçirilən yeni təhsil modeli çərçivəsində hazırlanıb. Kitab türk dünyasının tarixini, dilini, mədəniyyətini və ortaq irsini 15 coğrafi marşrut üzrə təqdim edir.

Güney Azərbaycana ayrıca bölmənin ayrılması, Təbrizin bu diyarın ürəyi kimi təqdim olunması, eləcə də “Traktor” azarkeşlərinin dil və mədəni kimliyinin əks etdirilməsi kitabın diqqətçəkən məqamlarıdır. Bu yanaşma Türkiyənin gənc nəslinin Güney Azərbaycan türklərinin tarixi, mədəniyyəti və kimliyi ilə daha yaxından tanış olmasına töhfə verə bilər.

GunAz TV
R.G

GUNAZ.TV

SON XƏBƏRLƏR