Contact Us

SON XƏBƏRLƏR

Təbrizin millət vəkili “Türk Dili və Ədəbiyyatı Mədəniyyət Evi”nin yaradılması ilə bağlı hökumətin yalanlarını tənqid edib

2021.10.20, 07:36
Təbrizin millət vəkili “Türk Dili və Ədəbiyyatı Mədəniyyət Evi”nin yaradılması ilə bağlı hökumətin yalanlarını tənqid edib

Gunaz.tv

GünAz TV: Təbrizin İran parlamentindəki millət vəkili Əhməd Əlirzabeygi prezident Həsən Ruhaninin illər öncə “Türk Dili və Ədəbiyyatı Mədəniyyət Evi”nin yaradılması haqda verdiyi vədi xatırladaraq belə bir mərkəzin yaradılmamasını kəskin tənqid edib.

 

O bu barədə yanvarın 4-də Şərqi Azərbaycan İdarə Şurasının keçirdiyi iclasda danışıb.

 

“Mədəniyyət bizim həyatımızı reallaşdırır. Ona görə də “Türk Dili və Ədəbiyyatı Mədəniyyət Evi” haqda müəyyən tələblərimiz var. Mədəniyyət oksigen kimidir. Onu biz əhaliyə verməsək, uzaq ölkələrdən zəhərlənmiş şəkildə bizə veriləcək. Bizim gərək fars dilində olduğu kimi türk dili üçün də bir istinad mərkəzimiz olsun”- deyə millət vəkili bildirib.

 

Ə.Əlirzabeygi sözlərinin davamında İran prezidenti Həsən Ruhaninin seçkiqabağı Azərbaycan əhalisinə verdiyi vədlərə də işarə edib.

 

“Prezident seçkilər dönəmindəki səfəri zamanı bu barədə əhaliyə vəd verdi. Lakin səlahiyyətli məsullar məsuliyyətdən yayınsınlar deyə müxtəlif bəhanələrlə bu işi yerinə yetirmək istəmirlər. İran, Azərbaycandan başlayır. Ona görə də “Türk Dili və Ədəbiyyatı Mədəniyyət Evi” təsis edilərək birliyimiz təmin olunmalıdır. Bu, qətiyyən qövmçülük sayılmır”- deyə o vurğulayıb.

 

“Türk Dili və Ədəbiyyatı Mədəniyyət Evi”nin yaradılması İran prezidenti Həsən Ruhaninin 2013-cü il prezident seçkiləri öncəsi Azərbaycan əhalisinə verdiyi vədlərdən biri olub. Lakin o prezident seçildikdən sonra verdiyi vədi yerinə yetirməyib. 2015-ci ildə isə “Türk Dili və Ədəbiyyatı Mədəniyyət Evi”nin yerinə Təbrizdə  “Azərbaycan Ədəbiyyat, İncəsənət və Mədəniyyət Mərkəzi” təsis edilib. Hazırda mərkəzin yaradılmasından 2 ildən çox keçir, lakin qurum Azərbaycanın ədəbiyyat, incəsənət və mədəniyyəti uğrunda heç bir addım atmayıb. Mərkəzin adında türk sözündən istifadə olunmaması da  onun fəaliyyətinin hansı istiqamətdə olduğuna ciddi işarədir.

 

N.S

Açar Sözlər :

SEÇİLMİŞ XƏBƏRLƏR

Çox oxunanlar