ETTELAAT Nazirliyi: “Əhvazda hərbi parada hücumda əli olan 22 nəfər həbs edilib”

SON XƏBƏRLƏR

ETTELAAT Nazirliyi: “Əhvazda hərbi parada hücumda əli olan 22 nəfər həbs edilib”

2021.10.20, 07:36

Gunaz.tv

GünAzTV: İranın Kəşfiyyat Nazirliyi (ETTELAAT) sentyabrın 24-də bəyanat yayaraq dörd gün əvvəl Əhvaz şəhərində keçirilən hərbi parada hücumda rolu olan onlarla şəxsin yaxalanmasından xəbər verib.

Bəyanatda bildirilir ki, “Sepah”ın və ordunun birgə keçirdiyi hərbi parada hücumun təşkilində günahlandırılan şəxslər Əhvaz şəhərində həbs edilib: “Hücumda əli olan 22 nəfər həbs edilib. Həmin şəxslərin evlərində axtarış aparılarkən bir sıra partlayıcı maddələr, silah-sursat və digər hərbi avadanlıqlar aşkarlanaraq götürülüb. Həbs edilənlər, bölgənin mürtəce ərəb ölkələri tərəfindən dəstəklənən separatçı təkfirçilərdir. Faktla bağlı araşdırma aparılır”.

ETTELAAT-ın yaydığı bəyanatda həbs edilən şəxslərin adları açıqlanmayıb.

Xatırladaq ki, sentyabrın 22-də İran-İraq müharibəsinin 38-ci ildönümü münasibətilə Əhvaz şəhərində keçirilən hərbi parada silahlı hücum olub. Dörd silahlı şəxs, şəhərin “Qüds” bulvarında keçirilən hərbi parada qatılanlara yaxınlıqda yerləşən bir parkın içindən odlu silahlardan atəş açıb. Atəş nəticəsində ən azı 25 “Sepah”çı, hərbçi və mülki vətəndaş həlak olub, 60-a yaxın insan yaralanıb.

İran ərəblərinin milli və dini hüquqları uğrunda mübarizə apardığını bildirən “Əl-Əhvaz Qurtuluş Ərəb Hərəkatı hücumun məsuliyyətini üzərinə götürsə də, sonradan həmin cərəyanın bununla bağlı yayılan məlumatları təkzib etməsi barədə ziddiyyətli məlumatlar yayılıb. Hadisədən az sonra İŞİD terror qruplaşması bəyanat yayaraq, hərbi parada silahlı hücumun məsuliyyətini üzərinə götürüb və bununla bağlı bir video da yayıb.

A.M

GUNAZ.TV

SON XƏBƏRLƏR