GünAz TV: Güney azərbaycanlı milli-mədəni fəal Əmir Səttari tələbinin məsullar tərəfindən təmin edilməsi ilə bağlı vəd verildikdən sonra aclıq aksiyasını dayandırıb.

Bu barədə Əmir Səttari yaxınları ilə əlaqə saxlayaraq məlumat verib. O bildirib ki, məsullar onun irəli sürdüyü iddialara yenidən baxmaqla bağlı söz verib, bundan sonra iyunun 22-də, 13 gün aclıqdan sonra aksyasını dayandırmaq qərarına gəlib.

Azərbaycanlı fəalın Kərəcin Rəcayişəhr həbsxanasından yenidən Təbrizin Mərkəzi Zindanına qaytarıldığı bildirilir.

Əmir Səttari iyunun 19-u, aclıq aksiyasının 10-cu günündə Ettelaat İdarəsinin qərarı ilə Təbrizin Mərkəzi Zindanından Kərəcin Rəcayişəhr həbsxanasına köçürülmüşdür.

Fəalın ailəsinin verdiyi məlumata görə, Rəcayişəhr həbsxanasının məsulları Əmir Səttarinin bu zindana köçürülməsini qanunsuz hesab edərək onu qəbul etməkdən imtina edib, fəal iyunun 20-də Təbrizin İnqilab Məhkəməsinə göndərilib.

Bundan sonra o Təbriz İnqilab Məhkəməsinin 11-ci şöbəsinin qərarı ilə yenidən Təbrizin Mərkəzi Zindanına qaytarılıb.

Əmir Sətttari yeni məhkəmə işinin açılması və ağır hökm çıxarılması ilə nəticələnən dosyesindəki iradlar və məhkəmə işinin ləngiməsinə etiraz olaraq iyunun 10-da Təbrizin Mərkəzi Zindanında aclıq aksiyasına başlayıb. Fəal məhkum olunduğu 7 aylıq həbs cəzasını başa vursa da yeni hökmə görə azadlığa buraxılmır.

Azərbaycanlı fəal dosyesindəki iradların təhlükəsizlik orqanlarının məhkəmə işinə müdaxiləsi nəticəsində əmələ gəldiyini bildirir.

Təbriz sakini olan Əmir Səttari universitetdə humanitar elmlər üzrə təhsil alır. O 2018-ci ilin yanvar (1396-cı ilin dey ayı) ayı etirazlarında təhlükəsizlik qüvvələri tərəfindən döyülərək saxlanılıb və Təbriz zindanına aparılıb. Fəal 25 gün sonra 100 milyon tümənlik mülki vəsiqə qarşılığında müvəqqəti olaraq azadlığa buraxılıb.

Azərbaycanlı fəal 2018-ci il yazın son ayında (1397-ci ilin xordad ayı) Təbriz İnqilab Məhkəməsinin 2-ci şöbəsi tərəfindən “milli təhlükəsizliyin əleyhinə toplaşma və sözləşmə” ittihamı ilə 7 ay azadlıqdan məhrum edilib. Hökm sonralar Şərqi Azərbaycan Apelyasiya Məhkəməsinin 3-cü şöbəsi tərəfindən olduğu kimi qüvvədə saxlanılıb. Fəal 2018-ci il iyulun 10-da 7 aylıq həbs cəzasını çəkmək üçün Təbrizin Mərkəzi Zindanına müraciət edib.

Əmir Səttari 2018-ci il sentyabrın 18-də Təbriz İnqilab Məhkəməsinin 2-ci şöbəsi tərəfindən “rəhbəri təhqir etmək” ittihamı ilə yenidən 6 ay həbs cəzasına məhkum edilib.

Təbriz İnqilab Məhkəməsinin 11-ci Hökmləri İcra edən Şöbəsi 2018-ci il payızın orta ayında (1397-ci ilin aban ayı) heç bir məlumat vermədən fəalın iki dosyesini birləşdirib. Bundan sonra Şərqi Azərbaycan Apelyasiya Məhkəməsinin 3-cü şöbəsi çıxarılan hökmləri “qanun və şəriətə uyğun gəlməyən” qərar kimi qiymətləndirərək fəal barəsində çıxarılan və icra olunan 7 aylıq hökmü 5 illik həbs qərarı ilə əvəzləyib.

N.S