İranda oğurluqda ittiham edilən şəxsin əli kəsilib

SON XƏBƏRLƏR

İranda oğurluqda ittiham edilən şəxsin əli kəsilib

2021.10.20, 07:36

Gunaz.tv

GünAz TV: Mazandaran Ədliyyə İdarəsi Sari həbsxanasında “professional oğru”nun əlinin kəsildiyi barədə məlumat yayıb.

Məlumatda həmin şəxsin 28 evdən oğurluq etdiyini etiraf etdiyi, buna görə də, barəsində çıxarılmış hökmün icra edildiyi deyilir.

İran İnsan Haqları Təşkilatı yayılan xəbərlərə bildirdiyi münasibətdə bu hökmü insan haqlarına zidd və işgəncə kimi dəyərləndirib.

“İnsan haqları təşkilatları, eləcə də İnsan Haqları Şurası İran İslam Respublikasını dəfələrlə insan haqları və humanizm prinsipləri ilə təzad təşkil edən bu cür çirkin hökmləri çıxarmaq və icra etməyə görə qınayıblar”,- deyə Təşkilatın bəyanatında qeyd edilir.

Digər tərəfdən, bu cür hökmlərin çıxarılmasına İranın bəzi millət vəkilləri və rəsmiləri də qarşı çıxırlar.

İran Milli Məclisinin Məhkəmə Komissiyasının idarə heyətinin üzvü Yəhya Kamalpur iki il öncə Məşhəddə oğrunun əlinin kəsilməsinə verdiyi reaksiyada bildirmişdi ki, hakim bu hökmün yerinə, məhkumun, eləcə də vətəndaşların ağır ailə-məişət şəraiti və problemlərini diqqətə alaraq, başqa hökm çıxarsaydı, daha yaxşı olardı. O həmçinin qeyd etmişdi ki, İranda milyardlarla yeyinti, korrupsiya, torpaq zəbt etmə və digər bu kimi oğurluqdan da ağır cinayət hesab edilən hallar var və bunları törədənlərin bir çoxu əksər vaxtlarda məsuliyyətə cəlb edilmir.

Qeyd etmək lazımdır ki, İran İslam Respublikasının cinayət məcəlləsinin 401-ci maddəsinə əsasən, ilk dəfə oğurluq edən şəxsin sağ əlinin 4 barmağı, 2-ci dəfə bu hal yaşanarsa, sol ayağı kəsilməlidir. Əgər həmin şəxs 3-cü dəfə oğurluq cinayəti törədərsə, ömürlük həbsə məhkum edilməli, 4-cü dəfə bu hal baş verərsə, o, edam edilməlidir.

Ə.A

GUNAZ.TV

SON XƏBƏRLƏR