Xudafərində su çatışmazlığı və infrastruktur problemləri həll olunmur

SON XƏBƏRLƏR

Xudafərində su çatışmazlığı və infrastruktur problemləri həll olunmur

2022.08.13, 09:45

Gunaz.tv

Xudafərin şəhərinin cümə imamı Hadi Ziyai bölgədə infrastrukturun məhv edildiyini deyib.

O, dəyişiklik və təmir adına şəhərin bir çox bölgələrində infrastrukturun dağıdıldığını, nəzərdə tutulan layihələrin yarışmçıq saxlanıldığını və bunun nəticəsində yerli əhalinin problemlərinin daha da çoxaldığını deyib.

"Bundan öncə mövcud olan və sonradan aradan aparılan imkanlardan yenidən istifadə etmək üçün əhali nə qədər gözləməlidir? Bu layihələri tamamlamağı bacarmayacaqdınızsa niyə başlayırdınız"-deyə, Hadi Ziyai məsulları tənqid edib.

Cümə imamı Araz çayının qıraında yerləşən bölgə əhalisinin susuzluqdan əziyyət çəkməsini, su çatışmazlığının olmasını utandırıcı adlandırıb.

"Araz çayının bir neçə metrliyində yaşayan insanlar susuz qalıblar, bu sadəcə ayıbdır"-deyə, molla Ziyai qeyd edib.

Qeyd edək ki, Şərqi Azərbaycanın başqa bölgələrində olduğu kimi işsizlik və infrastruktur olmaması səbəbindən Xudafərindən də mərkəzi əyalətlərə köç davam edir.

Bir müddət bundan öncə Şərqi Azərbaycan əyalətinin Kəleybər, Xudafərin və Horand bölgələrinin İran parlamentindəki nümayəndəsi Hüseyn Hatəmi seçildiyi bölgələrin əhalisinin başqa yerlərə köçünün kəskin şəkildə artdığını deyib.

Onun sözlərinə görə, düzgün kommunikasiya yollarının olmaması, içməli və kənd təsərrüfatına lazım olan suyun çatışmazlığı bu prosesi sürətləndirib.

"Xudafərin, Kəleybər və Horand su bəndlərinin tikintisinin yarımçıq qalması, Xudafərin sərhəd-keçid məntəqəsinin işlək olmaması, tibb və səhiyyə infrastrukturunun yoxluğu təmsil olunduğum bölgə əhalisinin köçünə səbəb olub”-deyə, millət vəkili bildirib.

O, sadalanan problemlər ucbatından bu günə kimi sözügedən bölgədə yaşayan əhalinin sayının üç qatı qədər insanın başqa yerlərə miqrasiya etdiyini qeyd edib.

Hüseyn Hatəmi Kəleybər, Xudafərin və Horand bölgələrinin əsas problemlərindən birinin içməli su olduğunu deyib, “Peyğam” su bəndinin tikintisinin üstündən 25 il keçməsinə baxmayaraq 50% irəliləyiş olduğunu söyləyib.

Timur

GUNAZ.TV

SON XƏBƏRLƏR