Görüşdə Azərbaycanda səfərdə olan güney azərbaycanlı fəallar Sadıq İsabəyli, Günaz.TV-nin təsisçisi Əhməd Obalı və Çingiz Göytürk iştirak ediblər. Tədbirdə Güney Azərbaycanda baş verən etnik və mədəni diskriminasiya, bu məsələlərin beynəlxalq aləmdə işıqlandırılması müzakirə olunub. 

Qeyd edilib ki, Güney Azərbaycan məsələsi ilə bağlı İranda son dövrlərdə baş verən proseslər, xalq etirazları, ekoloji fəlakətlər, etnik diskriminasiya həmin ölkədə yaşayan milyonlarla azərbaycanlının mövcud vəziyyəti və gələcək taleyi ilə bağlı böyük narahatlıq yaradır.

İran cəmiyyətində sayca və keyfiyyətcə üstün mövqedə olan azərbaycanlılar hələ də bir çox hallarda fundamental insan hüquqlarından məhrum olur və etnik ayrı-seçkiliyə məruz qalırlar.

Ümumilikdə, İran və orada daxili dinamika beynəlxalq mətbuat tərəfindən işıqlandırılsa da, güney azərbaycanlıların problemləri gündəmə düşmür.

Günaz. TV-nin təsisçisi Əhməd Obalı deyib ki, İranda qız məktəblərinə hücumları dövlət içərisində olan müəyyən qruplar təşkil edir. O bildirib ki, həmin qruplar Prezident İbrahim Rəisiyə yaxın olanlardır: “Sıravi şəxslər bu qədər zəhəri əldə edə bilməz. Onlar millətdən qisas almaq istəyirlər.

Təkcə birinci zəhərlənmə hadisəsində 7 mindən çox qız zəhərlənmişdi. Amma hökumət bu rəqəmin 2 min olduğunu açıqlamışdı.

Ondan sonra yenə də proses davam edib. Hazırda zəhərlənənlərin sayı 20 minə yaxındır”.

Əhməd Obalı bildirib ki, İran Ermənistanın məğlubiyyətini həzm edə bilmir: "İranda aylardır aksiyalar davam edir. Son zamanlar səngisə də, bunun davamlı olacağı gözlənilir. Çünki İranda qadınlara azadlıq verilmir, iqtisadiyyat çöküb, rejim milləti idarə edə bilmir və millət də rejimi istəmir.

Son 3 gün ərzində yenə də qız şagirdlərə qarşı bir neçə məktəbdə kimyəvi hücumlar davam edib.

İran dövləti siyasətini farsçılıq üzərində qurduğuna görə türk düşmənçiliyi amili aradan qalxmayacaq. 

Azərbaycan gücləndikcə İran müəyyən addımlar atmağa çalışır. Ermənistan müharibəni uduzsa da, İran o məğlubiyyəti həzm edə bilmir. Lakin İranın əlində çox kart qalmayıb.

Yəqin ki, terror qruplarından və yaratdığı “beşinci kolon”dan istifadə edəcək. Amma Azərbaycan güclənir və bütün dünya, o cümlədən də ABŞ Azərbaycanın tərəfini tutub".

Finlandiyada yaşayan Güney azərbaycanlı fəal Çingiz Göytürk deyib ki, İran müstəqil Azərbaycan dövlətinin varlığını öz müstəqilliyinə təhdid olaraq görür.

O bildirib ki, bu səbəbdən də İran fars rejimi Azərbaycanın zəifləməsi, gücsüzləşməsi üçün dəridən-qabıqdan çıxır: "Azərbaycan xüsusən 44 günlük Vətən müharibəsindən sonra reallaşdırılan layihələrlə dünyanın diqqətini cəlb edib. Bu da İranın get-gedə əhəmiyyətsizləşməsinə gətirib çıxarıb.

Ona görə də bu layihələrin qarşısını almağa çalışır. Bunun üçün Azərbaycanın daxilində qurduğu terror ocaqları vasitəsilə təxribatlar törətməyə cəhd edir. Lakin Azərbaycan göstərdi ki, bizim cəmiyyət Yəmən, İraq cəmiyyəti deyil, daha bilinclidir və təxribatlara uymurlar".

Çingiz Göytürk bəyan edib ki, bu gün İran adlanan məkanda ən önəmli siyasi cərəyan qeyr-fars millətlərinin başlatdığı prosesdir. Onun sözlərinə görə, ölkədə etirazlar qismən səngimiş olsa da, milli hərəkatlar davam etməkdədir: "Oranı tədirginliyə çəkən əsas amil də məhz bu milli hərəkatlardı.

İranın ölkəmizə qarşı birmənalı münasibətinin olmamasına səbəb orada yaşayan 40 milyon Azərbaycan türkünün varlığıdır. 

Onlar dəfələrlə farsların qətliamlarına uğrayıb, ancaq inadlarından, mübarizələrindən geri çəkilməyiblər. İran Azərbaycan dövlətinin müstəqilliyindən, dünyada artan qüdrətindən qorxaraq, onu həzm edə bilmir". 

Ayxan