Urmu gölü ilə bağlı bəyanat yayıldı

SON XƏBƏRLƏR

Urmu gölü ilə bağlı bəyanat yayıldı

2023.09.10, 20:56

Urmu gölündə baş verən ekoloji fəlakətə görə fövqəladə vəziyyət elan edilsin.

Gunaz.tv

Bu barədə Təbrizdə fəaliyyət göstərən Azərbaycan İnkişaf Evinin yayımladığı bəyanatda bildirilib.

Qeyd olunub ki, dövlətin təbliğatının əksinə olaraq Urmiya gölü tarixinin ən acınacaqlı dövrünü yaşayır.

Bəyanat müəllifləri Urmu gölünün bərpası ilə bağlı verilən vədlərə əməl edilmədiyini, ayrılan vəsaitlərin təyinatı üzrə xərclənmədiyini bildiriblər.

Onlar Azərbaycanda baş verən ekoloji fəlakətin fəsadları barədə yazaraq, problemin aradan qaldırılmasına görə məsuliyyətini yerinə yetirməyən hökumət rəsmilərinin məsuliyyətə cəlb edilməsini tələb ediblər.

“Bu gün gölün quruması və duz fırtınalarının baş qaldırması nəticəsində bölgədə xərçəng və tənəffüs xəstəlikləri sürətlə yayılır. Bu və digər ekoloji fəsadlar, xüsusilə, Şərqi və Qərbi Azərbaycan əyalətlərində daha ciddi təhlükələr yaradır, əhalinin nigaranlığına və məcburi köçün başlamasına səbəb olur”, - bəyanatda bildirilib.

Bəyanatda İran hökumətindən gölü xilas etmək üçün bütün gücünü sərf etmək istənilib:

“Təcili və fövqəladə vəziyyət elan edilməli, tədbir görülməlidir. O cümlədən, beynəlxalq təşkilatlardan, Birləşmiş Millətlər Təşkilatı, Ümumdünya Ərzaq və Kənd Təsərrüfatı Təşkilatı, İslam Əməkdaşlıq Təşkilatı, eləcə də qonşu dövlətlər və bütün ekoloqlardan kömək istənilsin".

Qeyd edək ki, Urmu gölünün normal ekoloji su həcmi 30 milyard kubmetrdən çox, minimum ekoloji su həcmi isə 15,5 milyard kubmetr, minimum ekoloji sahəsi isə 4635 kvadrat kilometr olmalıdır.

Hazırda Urmu gölünün sahəsi 682 kvadrat kilometrə qədər kiçilib, su həcmi isə 900 milyon kubmetrdən azdır.

Timur

GUNAZ.TV

SON XƏBƏRLƏR