Sentyabrın 22-i gecə Güney Azərbaycan şəhərlərində etiraz aksiyaları davam edib

SON XƏBƏRLƏR

Sentyabrın 22-i gecə Güney Azərbaycan şəhərlərində etiraz aksiyaları davam edib

2022.09.23, 09:21

Gunaz.tv

Sosial media fəalları və insan haqları təşkilatlarının verdiyi məlumatlara görə, başda Təbriz olmaqla Ərdəbil, Xiyav (Meşgin), Məlikan, Mərənd, Marağa, Məlayer, Urmu, Zəncan, Üşnü, Qəzvin, Həmədan, Bukan, və b. etiraz aksiyaları geniş vüsət alıb.

Təbrizdə qarşıdurmaların şiddətlin olduğunu bildirən İran hökumətinə müxalif təşkilatlar bir neçə nəfərin öldürüldüyü, çox sayda etirazçının yaralandığı barədə məlumatlar yaysalarda, internetə qoyulan məhdudiyyətlər səbəbindən bunu dəqiqləşdirmək mümkün olmayıb.

Yayılan videolardan adı çəkilən şəhərlərin hamısında etirazçılarla xüsusi təyinatlı və polis qüvvələri arasında qarşıdurma olub, bir sıra hallarda hökumət məmurları aksiyaçılara odlu silahdan atəş açıblar.

Bir neçə şəhərdə etirazların kütləviləşdiyini və narazılarının sayının çoxaldığını görən hökumət məmurlarının hadisə yerindən qaçdığını əks etdirən videolar yayılıb.

Bir neçə şəhərdə hökumətin repressiyalara bəraət qazandırmaq üçün yarım hərbi BƏSİC qüvvələri və mülki geyimli təhlükəsizlik məmurlarının ictimai əmlaka ziyan vurmalarının qarşısı alınıb və onlar döyülərək aksiya keçirilən bölgələrdən qovulublar.

Qəzvində narazıların şəhər meydanında İran bayrağını endirmələri və ona od vurmaları SEPAH-ın cəza tədbirləri görəcəyi ilə bağlı sərt bəyanat verməsinə səbəb olub.

Qərbi Azərbaycan əyalətinin Üşnü şəhərində narazılarla hökumət məmurları arasında şiddətli qarşıdurmanın olduğu, xüsusi təyinatlı qüvvələrin əhaliyə qarşı odlu silahdan atəş açdığı bildirilib.

Bir neçə nəfərin yaralandığını, onlarla insanın həbs edildiyini xəbər verən sosial media fəalları hələlik onların kimliyinin dəqiqləşdirilə bilmədiyini yazırlar.

Bununla yanaşı aksiyaların genişləndiyi ilə eyni vaxtda güney azərbaycanlı milli-mədəni fəallar qadın hüquqları, ana dili, milli haqlar və başqa problemlərlə bağlı istəklərini ifadə edən türk dilində şüarlar səsləndirməyə başlayıblar.

Rejimə və Əli Xameneyiyə qarşı qarşı verilən şüarlarla yanaşı, ən çox səsləndirilən və xalq arasında rəğbətlə qarşılanan şüarlardan biri "Ədalət, Azadlıq, Milli hökumət" şüarıdır.

Cavidan