GünAz TV: Güney Azərbaycan İctimaiyyətinin etirazları nəticəsində İran rəsmiləri qondarma “Qarabağ Cümhuriyyəti”nin adını İran saytının dərc etdiyi xəritədən silib.
İran Yollarının İdarə Edilməsi saytı (141.ir) beynəlxalq qanunları ayaq altına alaraq yaydığı xəritədə Azərbaycan Respublikasının Ermənistan tərəfindən işğal olunmuş ərazilərini qondarma “Qarabağ Cümhuriyyəti” adı ilə dərc etmişdir.
Bu xəbərin Güney Azərbaycanda yayılması soydaşlarımızın kəskin etirazına səbəb oldu. Bundan sonra İran rəsmiləri ictimai rəy qarşısında geri addım ataraq qondarama adı xəritədən sildilər.
Dağlıq Qarabağın heç bir dövlət və beynəlxalq qurum tərəfindən tanınmadığını bilən İran rəsmilərinin qondarma “Qarabağ Cümhuriyyəti” ifadəsini işlətməsi şübhəsiz ki, Azərbaycana qarşı düşəmənçilikdən başqa heç nə deyil.
İranın Dağlıq Qarabağ münaqişəsi zamanı Ermənistana yardım etməsi barədə çox yazılıb. İslam Cümhuriyyətinin Azərbaycana qarşı qərəzli mövqeyi hələ də davam edir.
Ötən il Ermənistan ordusu tərəfindən törədilən Xocalı qətliamının 27-ci ildönümündən bir gün sonra işğalçı ölkənin baş naziri Nikol Paşinyan İrana rəsmi səfər etdi. O səfər çərçivəsində bu ölkənin prezidenti Həsən Ruhani və dini lideri Əli Xamneyi ilə görüşdü, tərəflər iki ölkə arasında əlaqələrin daha da genişlənməsi barədə müzakirələr apardılar.
Nikol Paşinyan Tehranda səfərdə olarkən “Ararat” klubunda erməni icması ilə görüş keçirdiyi zaman “Qarabağ Ermənistandır, vəssalam” yazılmış plakat qaldırılmışdır. İranın Azərbaycanın ərazi bütövlüyünə qarşı plakatın qaldırılmasına imkan tanıması güney azərbaycanlıların kəskin etirazına səbəb olmuşdur.
N.S
