ABŞ və Rusiya diplomatları biri-birindən nə tələb edirlər?

SON XƏBƏRLƏR

ABŞ və Rusiya diplomatları biri-birindən nə tələb edirlər?

2025.04.10, 12:39

İstanbulda Rusiya və ABŞ nümayəndə heyətləri arasında məsləhətləşmələr başlayıb.

Gunaz.tv

GünazTV “AzPolitika”-ya istinadla xəbər verir ki, hər iki ölkənin xarici siyasət idarələri müzakirələrin Moskva və Vaşinqtondakı diplomatik missiyaların işinin normallaşdırılması ilə bağlı olacağını bildiriblər.

Danışıqlar qapalıdır və Rusiyanın İstanbuldakı Baş Konsulluğunda aparılır. Məsləhətləşmələrdə Rusiya nümayəndə heyətinə Vaşinqtondakı səfir Aleksandr Darçiyev, Amerika nümayəndə heyətinə isə dövlət katibinin Avropa və Avrasiya məsələləri üzrə köməkçisinin müavini Sonata Kulter rəhbərlik edir.

Bu, İstanbuldakı məsləhətləşmələrin ikinci mərhələsidir; əvvəlkilər fevralın sonunda ABŞ Baş Konsulluğunun binasında baş tutub.

Dövlət Departamentinin sözçüsü Tammy Bruce bir gün əvvəl demişdi ki, "Ukrayna bu müzakirələrdə gündəmdə deyil".

O vurğulayıb ki, ümumilikdə ikitərəfli münasibətlərin normallaşdırılmasından söhbət getməyəcək, diplomatlar səfirliklərin normal fəaliyyətinin bərpası məsələsinə xüsusi diqqət yetirəcəklər. Son illərdə diplomatların və səfirlik işçilərinin qovulmasından və səfirliklərdə işləyə biləcək işçilərin sayına qoyulan məhdudiyyətlərdən sonra diplomatik fəaliyyət əhəmiyyətli dərəcədə məhdudlaşdırılıb.

Rusiya diplomatlarının ABŞ-da istifadə etdiyi bir sıra mülklər, o cümlədən San-Fransisko və Sietldəki konsulluqlar, Vaşinqton və Nyu Yorkdakı ticarət nümayəndəlikləri və diplomatların tətil üçün istifadə etdikləri iki dövlət mülkləri qapadılıb.

Rusiyada isə Moskvanın təkidi ilə ABŞ-nin Sankt-Peterburqdakı Baş Konsulluğu bağlanıb, tətbiq edilən məhdudiyyətlər, kadr çatışmazlığı səbəbindən ABŞ Vladivostok və Yekaterinburqdakı konsulluqlarının işini dayandırmaq məcburiyyətində qalıb. ABŞ-ın Moskvadakı səfirliyi Rusiya vətəndaşlarına ABŞ vizalarının verilməsini faktiki olaraq dayandırıb.

Donald Tramp vəzifəyə gəldikdən sonra ABŞ rəsmiləri müxtəlif səviyyələrdə Rusiya rəsmiləri ilə dəfələrlə görüşüblər. Bu, əvvəlki administrasiya dövründə olduqca nadir olan təmaslar hesab olunur. Trampın təkid etdiyi əsas məqsədə - Ukraynada sülhün əldə edilməsi və ya ən azı atəşkəs hələ də əldə olunmayıb.

Ş.E

GUNAZ.TV

SON XƏBƏRLƏR