Bakıda Türkiyə və İsrail arasında danışıqlar aparılıb

SON XƏBƏRLƏR

Bakıda Türkiyə və İsrail arasında danışıqlar aparılıb - DETALLAR

2025.04.10, 13:56

Türkiyə Milli Müdafiə Nazirliyinin (MSB) nümayəndələri həftəlik mətbuat konfransında jurnalistlərin suallarını cavablandırıb.

Gunaz.tv

Türkiyə Milli Müdafiə Nazirliyinin mənbələri Suriyadakı son vəziyyət və İsrailin Suriya bazalarını vurması ilə bağlı suallarla bağlı aşağıdakı qiymətləndirmələri edib:

"Türkiyə olaraq Suriyada yeni hökumətin tələbləri istiqamətində onların müdafiə qabiliyyətinin artırılması və İŞİD başda olmaqla bütün terror təşkilatlarına qarşı mübarizəsi üçün dəstək veririk. Bu çərçivədə təlim məqsədi ilə bazanın yaradılması üçün qiymətləndirmələr davam edir. Türkiyənin yeganə məqsədi Suriyanın ərazi bütövlüyünü, sabitliyini və təhlükəsizliyini qoruyub saxlamaq, onu terrordan təmizləməkdir. Türkiyənin bunu etmək niyyəti, gücü və vizyonu var. Bu məqsədlə həyata keçirilən və həyata keçiriləcək bütün fəaliyyətlər iki dövlət arasında əldə olunan razılaşma çərçivəsində, beynəlxalq hüquq normalarına uyğun və üçüncü ölkələri hədəf almadan həyata keçirilir."

Nazirlik nümayəndələri Türkiyə ilə İsrail arasında “Suriyada münaqişənin olmaması” üçün hər hansı bir əlaqənin olub-olmaması ilə bağlı suala belə cavab verib:

"Suriyada arzuolunmaz insidentlərin qarşısının alınması üçün gərginliyin azaldılması mexanizminin yaradılması ilə bağlı dünən Azərbaycanda ilk texniki görüş keçirilib. Gərginliyin azaldılması mexanizminin yaradılması istiqamətində işlər davam etdiriləcək".

Xatırladaq ki, Azərbaycan Prezidenti İlham Əliyev dünən verdiyi açıqlamada rəsmi Bakının Türkiyə-İsrail münasibətlərində oynadığı rola diqqət çəkmişdi:

“Azərbaycan bu iki dost ölkə arasında əməkdaşlıq mühitinin qorunmasında mühüm vasitəçidir. Biz həm Türkiyə, həm də İsrail ilə yüksək səviyyəli tərəfdaşlığa malikik. Regionda sabitlik və təhlükəsizlik naminə belə üçtərəfli dialoqlara ev sahibliyi etməyə hazırıq”, – deyə dövlət başçısı vurğulamışdı.

Analitiklər hesab edirlər ki, Bakıdakı bu görüş regionda balanslaşdırılmış münasibətlər sisteminin qurulmasına xidmət edir. Türkiyə və İsrail arasında zaman-zaman baş qaldıran gərginliklərin fonunda belə bir görüşün Azərbaycanın vasitəçiliyi ilə baş tutması, Cənubi Qafqazın geosiyasi statusunu dəyişməkdədir.

Həmçinin qeyd olunur ki, İranla Qərb, eləcə də Rusiya arasında toqquşma riski artdığı bir dönəmdə Suriyada Türkiyə və İsrailin birbaşa toqquşmasının qarşısını almaq məqsədi ilə atılan bu addım regional sabitlik üçün mühüm siqnaldır.

Şahin Elxanoğlu

GUNAZ.TV

SON XƏBƏRLƏR