Daha bir ölkə “SEPAH”ı terror təşkilatı kimi tanıyıb

SON XƏBƏRLƏR

Daha bir ölkə “SEPAH”ı terror təşkilatı kimi tanıyıb

2025.04.25, 11:23

Paraqvay İranın İslam İnqilabı Keşikçiləri Korpusunu (“SEPAH”) terror təşkilatı kimi tanıyıb.

Gunaz.tv

GünazTV xəbər verir ki, bu barədə Paraqvay Prezidenti Santyaqo Penya fərman imzalayıb.

Paraqvay rəsmi olaraq “SEPAH”ı terror təşkilatı kimi tanıyıb, eyni zamanda bu qərarı Fələstinin HƏMAS və Livanın “Hizbullah” təşkilatlarının bütün strukturuna da şamil edib. Belə ki ki, rəsmi Asunsyon bu qərarı HƏMAS və “Hizbullah”ın təkcə silahlı qanadlarına deyil, həm də siyasi və sosial quruluşlarına aid edib.

“Bu tədbirlər beynəlxalq ictimaiyyətin sülhünün, insan hüquqlarının və təhlükəsizliyinin sistematik pozuntularına cavabdır”, – Paraqvay lideri sosial şəbəkədə yazıb.

Bundan başqa, dövlət başçısının dərc etdiyi rəsmi bəyanata görə, Paraqvay “zərərli təhdidlərdən biri olan terrorizmə qarşı mübarizədə öz qəti və dəyişməz mövqeyini təsdiqləyir”.

Qeyd olunub ki, “Sepah”ın siyahıya daxil edilməsi hərbi quruluşun “insan hüquqlarının sistematik pozulmasında iştirakı və qlobal miqyasda terror fəaliyyətlərinə cəlb olunması” ilə əlaqədardır.

Bildirilib ki, bu cür tədbirlər Amerika və İsrail kimi ölkələrlə strateji ittifaqları gücləndirir. Sənəddə terrorçuluğun “sərhəd və bayraq tanımadığı” vurğulanıb.

Qeyd edək ki, Amerika Dövlət Departamenti yaydığı bəyanatda Santyaqo Penyanın SEPAH-ı terror təşkilatı kimi tanımasını alqışlayır:

"İran dünyada terrorizmin aparıcı sponsoru olaraq qalır və özünün SEPAQ-Qüds Qüvvələri, Hizbullah və Həmas kimi terror qüvvələri vasitəsilə qlobal miqyasda çoxsaylı terror hücumlarını və fəaliyyətlərini maliyyələşdirib və idarə edib. Paraqvayın atdığı mühüm addımlar İran rejiminin və onun proksi qüvvələrinin terror hücumları planlaşdırmaq və Paraqvayın Argentina və Braziliya ilə payladığı Üç Sərhəd Bölgəsində pul toplamaq imkanlarını kəsməyə kömək edəcək. Birləşmiş Ştatlar qlobal təhlükəsizlik təhdidləri ilə mübarizə aparmaq üçün Paraqvay kimi tərəfdaşlarla işləməyə davam edəcək. Biz bütün ölkələri İran rejimini məsuliyyətə cəlb etməyə və onun əməliyyatçılarının öz ərazilərində fəaliyyət göstərməsinin qarşısını almağa çağırırıq."

Şahin Elxanoğlu

GUNAZ.TV

SON XƏBƏRLƏR