İranda yeni qurum yaradıldı - Pezeşkian başçı seçildi

SON XƏBƏRLƏR

İranda yeni qurum yaradıldı - Pezeşkian başçı seçildi

2025.08.04, 10:49

İranda Milli Müdafiə Şurasının yaradılması rəsmi şəkildə elan edildi.

Gunaz.tv

Bu haqda Ali Milli Təhlükəsizlik Şurasının Katibliyi məlumat yayıb.

“Müdafiə Şurası mərkəzləşdirilmiş qaydada müdafiə planlarına və silahlı qüvvələrin imkanlarının artırılmasına baxır”,- məlumatda bildirilib.

Qeyd olunub ki, silahlı qüvvələrin başçıları, silahlı qüvvələrin komandirləri və bəzi müvafiq nazirliklərdən ibarət olan yeni quruma
prezident Məsud Pezeşkian sədrlik edəcək.

Qeyd edək ki, bundan əvvəl İran-İraq müharibəsi dövründə də oxşar şura yaradılmışdı.

SEPAH-a bağlı "Təsnim" xəbər agentliyi Müdafiə Şurasının yaradılması ilə bağlı yaydığı məlumatda yeni qurumun yaradılma məqsədini açıqlayıb:

“Yeni təhlükəsizlik çağırışlarını, regional və qlobal təhdidlərin mürəkkəbliyini nəzərə alaraq, Müdafiə Şurasının bərpası ölkənin müdafiə sahəsində qərarların qəbulunda çevikliyə və diqqətə səbəb ola bilər”.

Yeni şuranın formalaşdırılmasının İranın hərbi potensialının gücləndirilməsinə hansı təsirinin olacağı hələlik bəlli deyil.

Müdafiə Şurasının yaradılmasının rəsmi elanı İsrail və İran arasında hərbi münaqişənin yenidən başlaya biləcəyi ilə bağlı proqnozların artması fonunda baş verib.

Bəzi təhlilçilərin fikrincə Müdafiə Şurasının yaradılması xalqı, ölkəni müdafiə etmək məqsədi daşımır, bu daha çox hakim sistemi müdafiə etmək, onun dağılmasının qarşısını almağa hesablanıb.

Qeyd edək ki, Məsud Pezeşkian seçki qabağı bəyanatlarında seçkilərə qatılmaqda məqsədinin seçici fəallığını artırmaq və təhlükədə olan İslam Respublikası sistemini xilas etmək olduğunu bildirmişdi.

GünazTV

GUNAZ.TV

SON XƏBƏRLƏR