Contact Us

SON XƏBƏRLƏR

İran mediası ravvinlər konfransının ləğvindən yazdı

2025.11.05, 12:26
İran mediası ravvinlər konfransının ləğvindən yazdı

3-6 noyabrda Bakıda keçiriləcəyi elan edilən “Avropa ravvinləri konfransının” (Conference of European Rabbis) ləğv edilməsi İran mediasında geniş müzakirə mövzularından birinə çevrilib.

Gunaz.tv

Məsələ ilə bağlı xüsusən SEPAH-a bağlı media orqanları daha çox fəallıq göstərir.

SEPAH-ın "Təsnim" xəbər agentliyi konfransın ləğvini "Bakı dövlətinin strateji səhvdən məcburi geri çəkilməsi" başlığı ilə yayıb.

Azərbaycan hökuməti və rəsmilərini İsraillə münasibətlərə görə tənqid edən "Təsnim", "şiə ölkəsində belə bir konfransın keçirilməsinin planlaşdırılmasını qıcıqlandırıcı və təhqiramiz" adlandırıb.

SEPAH mediası, konfransın ləğv edilməsinin səbəbi kimi islam dünyası və hətta Azərbaycan Respublikasının müttəfiqi olan Türkiyənin narazılığı ilə bağlı olduğunu iddia edib.

Yazıda İran rəsmilərinin Qəzza ilə bağlı ənənəvi bəyanatları təkrarlanıb, İsraillə münasibətlərə görə Azərbaycan Respublikasının islam dünyasında mənəvi və mədəni dayaqlarını itirməkdə olduğu deyilib, Azərbaycan dolayısı ilə təhdid edilib:

"Təl-Əvivlə açıq şəkildə hər hansı bir əlaqə onun regional cinayət tərəfdaşları sırasına qoşulmaq deməkdir. Sionist rejimin qeyri-insani siyasətinə uyğun davrananlar regionda və beynəlxalq sistemdə olduqca ağır və ağlasığmaz bədəl ödəyə bilərlər".

Bununla yanaşı SEPAH-ın keçmiş baş komandanı və İran Məsləhət Şurasının üzvü Möhsün Rzayinin nəzarətində olan "Tabnak" saytı da oxşar məzmunlu yazı dərc edib:

"Tənqidçilər iki il əvvəl İsrailin Qəzzada soyqırımından sonra Bakı konfransını müsəlmanlara qarşı təhqir hesab edirlər. Qəzzada baş verən son soyqırımdan sonra Bakı hökumətinin İsrail rejimi ilə isti münasibətləri bölgədəki geniş müsəlman xalqları və elitalarının tənqidlə üzləşib".

SEPAH-ın başqa media orqanı, "Fars" xəbər agentliyi isə İran rəhbəri Əli Xaməneinin müşaviri Əli Əkbər Vilayətinin  bir müddət əvvəl konfransla bağlı xəbərdarlıq çıxışını xatırladıb və konfransın ləğvi xəbərini də ona istinadən yayıb.

Vilayəti özünün X hesabındakı paylaşımında "geniş etirazlar səbəbindən Azərbaycan ökumətinin Ravvinlər konfransını ləğv etdiyini" iddia edib. 

Adı çəkilən media orqanları, hökumət və SEPAH-a bağlı başqa sayt və qəzetlərdə dərc olunan yazların əsas ideoloji xətti və hətta yazı üslubunun da eyni olması bunun bir mənbədə, Əli Xaməneinin ofisinə bağlı və "İran islam inqilabının ixracı"nı hədəf götürən ideoloji mərkəzdə hazırlandığından xəbər verir.

Qeyd edək ki, bununla eyni vaxtda xaricdə, İranda və Azərbaycan respublikasının özündə həmin mərkəzə bağlı olan anti-Azərbaycan qruplaşmalar, sosial media kanalları da oxşar məlumatlar yaymaqla, konfransın ləğvini İranın qələbəsi kimi qələmə verməyə çalışırlar.

GünazTV

Açar Sözlər :

SEÇİLMİŞ XƏBƏRLƏR

Çox oxunanlar