İranda rabitənin kəsilməsindən bəri Azərbaycan siyasi məhbuslarının durumu barədə xəbər almaq olmur

SON XƏBƏRLƏR

İranda rabitənin kəsilməsindən bəri Azərbaycan siyasi məhbuslarının durumu barədə xəbər almaq olmur

2026.01.17, 11:14

İran hökuməti tərəfindən etirazların sərt şəkildə yatırılması, internet və telefon xətlərinin geniş şəkildə kəsilməsi ilə yanaşı, Azərbaycan siyasi məhbuslarının taleyi qeyri-müəyyən olaraq qalır.

Gunaz.tv

Məlumatlı mənbələrin bildirdiyinə görə, məhbusların ailələri son günlərdə yaxınlarının vəziyyəti ilə bağlı heç bir xəbər ala bilməyiblər və buna görə də onların təhlükəsizliyi və saxlanma şəraiti ilə bağlı narahatlıqlar artıb.

Evin həbsxanasında saxlanılan bəzi Azərbaycan siyasi məhbuslarının ailələri məhbuslarının vəziyyətini izləmək üçün məhkəmə orqanlarına və həbsxana rəsmilərinə müraciət ediblər. Lakin məhkəmə rəsmiləri və Evin həbsxanasının idarəetməsi "əlavə xəbərdarlığa qədər" məhbuslarla görüşün mümkün olmadığını və bu məhdudiyyətlərin davam edəcəyini bildiriblər.

Mənbələr həmçinin məhbusların telefon danışığı aparmaq hüququnun da tamamilə ləğv edildiyini bildiriblər.

Xatırladaq ki, 5 yanvar 2025-cü il, Bazar ertəsi günü, Azərbaycanlı siyasi fəal Yürüş Mehralibəyli, xalq etirazları ilə bağlı video mesaj yayımladıqdan və Azərbaycan siyasi təşkilatları və partiyalarının etiraz çağırışları etməsinin vacibliyini vurğuladıqdan bir neçə saat sonra Təbriz şəhərində İslam Respublikasının təhlükəsizlik qüvvələri tərəfindən həbs edilmişdi.

Qeyd edək ki, Vədud Əsədi, Salar Tahir Əfşar, Ayaz Seifxah, Araz Aman, Mürtəza Pərvin, Məhəmməd Rza Fəqihi, Abbas Lisani, Mahmud Ocaqlı, Tahir Nəqəvi və Bagir Hacızadə hazırda Tehranın Evin Həbsxanasında həbsdə olan Azərbaycanlı siyasi fəallardırlar.

Ş.A

GUNAZ.TV

SON XƏBƏRLƏR