Hörmüz boğazı neft tankerlərindən boşalıb

SON XƏBƏRLƏR

Hörmüz boğazı neft tankerlərindən boşalıb

2026.02.28, 17:25

Gunaz.tv

Beynəlxalq dəniz nəqliyyatı izləmə sistemlərinin məlumatlarına əsasən, Hörmüz boğazı ətrafında neft tankerlərinin hərəkət sürəti kəskin şəkildə azalıb və bəzi nöqtələrdə demək olar ki, sıfıra enib. Gəmi izləmə məlumatları göstərir ki, bir sıra tanker ya boğaza daxil olmadan əvvəl dayanıb, ya da ərazidə gözləmə mövqeyi tutaraq növbəti göstərişləri gözləyir.

Reuters agentliyinin yaydığı xəbərə görə, bir neçə Avropa dövləti öz bayrağı altında üzən neft tankerlərinə növbəti bildirişədək Hörmüz boğazından keçməməyi tövsiyə edib. Məlumata əsasən, bu qərar mümkün risklərin azaldılması və ticarət donanmasının təhlükəsizliyinin təmin olunması məqsədilə ehtiyat tədbiri kimi qəbul edilib.

Hörmüz boğazı qlobal enerji təchizatı baxımından strateji əhəmiyyətə malikdir. Yaxın Şərq ölkələrinin ixrac etdiyi xam neft və qaz kondensatının mühüm hissəsi məhz bu marşrut vasitəsilə dünya bazarlarına çıxarılır. Boğazda hərəkətin dayanması və ya kəskin azalması beynəlxalq enerji bazarlarında ciddi təsirlərə səbəb ola bilər.

Enerji bazarı üzrə analitiklər bildirirlər ki, mövcud vəziyyət davam edərsə, dünya bazarlarında neft qiymətlərində artım və volatilliyin yüksəlməsi ehtimalı güclənə bilər.

GünAzTV
R.G

GUNAZ.TV

SON XƏBƏRLƏR