Müctəba Xameneinin liderliyi iddiası güclənir

SON XƏBƏRLƏR

Müctəba Xameneinin liderliyi iddiası güclənir

2026.03.04, 00:01

Gunaz.tv

Əli Xameneinin 2026-cı ilin fevral ayının sonlarında ABŞ və İsrailin birgə hava zərbələri nəticəsində həlak olmasından sonra İranda hakimiyyətin ötürülməsi prosesi həlledici mərhələyə daxil olub. Beynəlxalq media qurumlarının yaydığı məlumatlara görə, Müctəba Xamenei varis kimi əsas namizədlərdən biri hesab olunur və bəzi mənbələr onun prosesdə önə çıxdığını bildirir.

İran Konstitusiyasına əsasən, yeni ali rəhbərin seçilməsi İran Ekspertlər Məclisinin səlahiyyətinə daxildir. 88 yüksək rütbəli din xadimindən ibarət olan bu qurum rəhbəri seçir və onun fəaliyyətinə nəzarət edir. Keçid dövründə isə prezident, məhkəmə hakimiyyətinin rəhbəri və Məsləhət Şurasının bir üzvündən ibarət müvəqqəti şura idarəçiliyi həyata keçirir.

Məlumatlara görə, davam edən hərbi gərginlik və regional qeyri-sabitlik fonunda Tehrandakı hakimiyyət strukturları mümkün hakimiyyət boşluğunun qarşısını almaq üçün sürətli qərar verilməsinin tərəfdarıdır. Bir sıra mənbələr İslam İnqilabı Keşikçiləri Korpusunun Müctəba Xameneinin namizədliyini dəstəklədiyini və onun vasitəsilə sistem daxilində sabitliyi qorumağa çalışdığını iddia edir.

56 yaşlı Müctəba Xamenei illərdir siyasi səhnədə açıq vəzifə tutmasa da, hakimiyyət daxilində təsirli fiqur kimi tanınır. Onun İnqilab Keşikçiləri və “Bəsic” qüvvələri ilə yaxın münasibətləri olduğu bildirilir. Lakin yüksək dövlət vəzifələrində rəsmi idarəçilik təcrübəsinin olmaması müzakirə mövzusudur.

Ekspertlər qeyd edirlər ki, onun seçilməsi İran siyasi sistemində irsi modelin formalaşması ilə bağlı mübahisələri gücləndirə bilər. İslam Respublikasının rəsmi ideologiyasında rəhbərliyin irsi ötürülməsi anlayışı qəbul olunmasa da, mövcud proseslər bu istiqamətdə yeni suallar doğurur.

Bəzi məlumatlara əsasən, yekun qərar hələ rəsmən elan edilməyib və hərbi-siyasi şərait seçki prosesinə təsir göstərə bilər. Bununla yanaşı, digər namizədlərin də adı hallansa da, hazırkı mərhələdə Müctəba Xamenei əsas fiqur kimi ön plana çıxır.

Regional gərginliyin artdığı və strateji nəqliyyat marşrutlarının təhlükəsizliyi ətrafında narahatlıqların davam etdiyi bir vaxtda Tehranda veriləcək qərarın ölkədaxili və beynəlxalq müstəvidə ciddi nəticələr doğura biləcəyi bildirilir.

GünAzTV
R.G

GUNAZ.TV

SON XƏBƏRLƏR