SEPAH-ın iddiasına Vaşinqtondan cavab gəldi

SON XƏBƏRLƏR

SEPAH-ın iddiasına Vaşinqtondan cavab gəldi

2026.05.29, 18:12

ABŞ Buşehr yaxınlığında pilotsuz aparatının vurulması iddiasını təkzib etdi; CENTCOM: Heç bir PUA-mız vurulmayıb.

Gunaz.tv

Gunaz.tv-nin məlumatına görə, ABŞ Silahlı Qüvvələri İran mediasında yayılan Amerika pilotsuz uçuş aparatının Fars körfəzi üzərində vurulması ilə bağlı xəbərləri rədd edib.

ABŞ Mərkəzi Komandanlığı (CENTCOM) İran dövlət televiziyasının Buşehr yaxınlığında Amerika hərbi aparatının vurulduğu barədə məlumatını təkzib edib.

CENTCOM “X” sosial şəbəkəsində yaydığı açıqlamada bildirib ki, İran heç bir Amerika hava vasitəsini vurmayıb və ABŞ-a məxsus bütün hərbi təyyarələr və avadanlıqlar təhlükəsiz vəziyyətdədir və tam şəkildə nəzarət altındadır.

Bundan əvvəl SEPAH-a yaxın “Tasnim” agentliyi hərbi mənbəyə istinadən ABŞ-a məxsus bir pilotsuz aparatın Buşehr yaxınlığında raketlə vurulduğunu iddia etmişdi.

“Fars” agentliyi isə cümə günü səhər saatlarında Buşehr vilayətində yerləşən hava hücumundan müdafiə sistemlərinin Fars körfəzi üzərində uçan naməlum obyektə atəş açdığını yazmışdı.

Eyni zamanda İran mediası Bəndər-Abbasda atəş səslərinin eşidildiyini bildirsə də, İran Silahlı Qüvvələri şəhərdə heç bir partlayışın qeydə alınmadığını və səslərin dənizdən gəldiyini açıqlayıb.

İran hərbçiləri əlavə ediblər ki, bu atəşlər SEPAH-ın “qanun pozan gəmilər” adlandırdığı bəzi gəmilərə xəbərdarlıq məqsədilə açdığı atəşdən sonra baş verib.

Həftənin əvvəlində isə İran və ABŞ arasında, davam edən atəşkəs və danışıqlara baxmayaraq, Hörmüz boğazında qarşılıqlı atışma baş vermişdi.

GünAz TV
R.G

GUNAZ.TV

SON XƏBƏRLƏR