Mərkəzi əyalətdə daha 75 nəfərin əmlakı müsadirə edildi

SON XƏBƏRLƏR

Mərkəzi əyalətdə daha 75 nəfərin əmlakı müsadirə edildi

2026.06.01, 20:18

Gunaz.tv

Gunaz TV-nin məlumatına görə, Mərkəzi əyalətin İctimai və İnqilab Prokurorluğunun rəhbəri bazar günü daha 75 nəfərin əmlakının müsadirə edildiyini açıqlayıb.

İran məhkəmə hakimiyyətinə bağlı Mizan Xəbər Agentliyi həmin şəxsləri “düşməni dəstəkləyən ünsürlər” və “ölkəyə xəyanət edənlər” kimi təqdim edib və onların “xaricdə fəaliyyət göstərən müxalif şəbəkələrlə birbaşa əlaqədə olduqlarını və əməkdaşlıq etdiklərini” iddia edib.

Bununla belə, barələrində qərar çıxarılan şəxslərin kimliyi açıqlanmayıb. Həmçinin işlərin məhkəmə prosesi, təqdim edilən sübutlar və əmlakların müsadirəsinə dair hökmün hansı əsaslarla verildiyi barədə məlumat yayılmayıb.

Son aylarda, xüsusilə müharibənin başlamasından sonra təhlükəsizlik təzyiqlərinin artdığı bir dövrdə, hökumət mediasında vətəndaşların əmlaklarının müsadirə olunması və ya əlindən alınması ilə bağlı çoxsaylı xəbərlər dərc edilib. Buna baxmayaraq, məhkəmə və təhlükəsizlik qurumları bu hökmlərin əsaslandığı sənəd və sübutları ictimaiyyətə təqdim etməyiblər.

Bundan əvvəl də jurnalistlərin, siyasi və mülki fəalların, sənətçilərin, idmançıların və digər tanınmış şəxslərin əmlaklarının müsadirə edilməsi ilə bağlı xəbərlər yayılmışdı. Həmin şəxslər “xəyanət”, “vətən satqınlığı”, “düşmən dövlətlərlə əməkdaşlıq” və “İsrailə bağlılıq” kimi ittihamlarla üzləşiblər.

Tənqidçilər bildirirlər ki, belə ittihamların sübutlar açıqlanmadan və şəffaf məhkəmə prosesi keçirilmədən geniş şəkildə tətbiq olunması, təqsirləndirilən şəxslərin hüquqlarının pozulması və hakimiyyət tənqidçilərinə qarşı təhlükəsizlik yönümlü təzyiqlərin artması ilə bağlı narahatlıqları gücləndirir.

GünAz TV
R.G

GUNAZ.TV

SON XƏBƏRLƏR