Contact Us

SON XƏBƏRLƏR

El-Ninyo geri qayıdır; bu ilki qeyri-adi yağıntılar davam edəcəkmi?

2026.06.03, 21:20
El-Ninyo geri qayıdır; bu ilki qeyri-adi yağıntılar davam edəcəkmi?

Gunaz.tv

İqlim üzrə yeni proqnozlar yaxın aylarda “El-Ninyo” fenomeninin yenidən formalaşması ehtimalının artdığını göstərir. Bu hadisənin Yaxın Şərq və İran coğrafiyasında yağıntı və temperatur rejiminə təsir göstərə biləcəyi bildirilir.

Gunaz TV-nin məlumatına görə, El-Ninyo dünya üzrə ən mühüm iqlim hadisələrindən biri hesab olunur. Sakit okeanın səth sularının istiləşməsi nəticəsində yaranan bu fenomen müxtəlif bölgələrdə hava axınlarının istiqamətini dəyişdirə bilir. Bir çox hallarda El-Ninyo Yaxın Şərqin bəzi hissələrində yağıntıların artması ilə müşayiət olunub.

Bu proqnozlar Güney Azərbaycanın son aylarda nəzərəçarpacaq yağıntılar aldığı bir dövrdə açıqlanır. Bir sıra bölgələrdə su anbarları və göllərdə su səviyyəsi yüksəlib, Urmu gölü də uzun illərdən sonra qismən olsa da su ilə dolmağa başlayıb.

Bununla belə, mütəxəssislər son yağıntıları birbaşa El-Ninyo ilə əlaqələndirməyin hələ mümkün olmadığını bildirirlər. Ancaq bu fenomenin yenidən formalaşması ehtimalı qarşıdakı aylarda hava şəraitində qeyri-sabitliyin davam edə biləcəyinə və yağıntıların orta göstəricilərdən yüksək ola biləcəyinə işarə edir.

El-Ninyo tam şəkildə formalaşarsa, Yaxın Şərq ölkələri daha güclü yağıntılar, qəfil sel hadisələri və hava şəraitində nəzərəçarpacaq dəyişikliklərlə üzləşə bilər. Eyni zamanda, temperaturun yüksəlməsi və isti hava dalğalarının artması da mümkün nəticələr arasında göstərilir.

İqlim mütəxəssisləri hesab edirlər ki, qarşıdakı aylar region üçün həlledici ola bilər. Bu proses bir tərəfdən su qıtlığının təsirlərini azalda, digər tərəfdən isə sel və daşqın risklərini artıraraq yeni problemlər yarada bilər.

 

GünAz TV
R.G

Açar Sözlər :

SEÇİLMİŞ XƏBƏRLƏR

Çox oxunanlar