İranın 440 kiloqram zənginləşdirilmiş uranı haradadır? Agentlik Tehrandan təcili cavab istəyib

SON XƏBƏRLƏR

İranın 440 kiloqram zənginləşdirilmiş uranı haradadır? Agentlik Tehrandan təcili cavab istəyib

2026.06.04, 19:45

Gunaz.tv

Beynəlxalq Atom Enerjisi Agentliyi İranın nüvə obyektlərinə endirilən zərbələrdən sonra zənginləşdirilmiş uran ehtiyatlarının taleyi ilə bağlı Tehrandan təcili izahat tələb edib.

Gunaz TV-nin xəbərinə görə, Beynəlxalq Atom Enerjisi Agentliyi məxfi hesabatında İrandan nüvə obyektlərinə hücumlardan sonra zənginləşdirilmiş uran ehtiyatlarının taleyini ən qısa zamanda açıqlamağı istəyib.

Agentlik bildirib ki, müfəttişlərin bəzi nüvə mərkəzlərinə çıxışının olmaması və son bir ilə yaxın müddətdə nüvə materiallarının yoxlanılmasının mümkün olmaması “nüvə silahlarının yayılması ilə bağlı narahatlıq” yaradıb. Qurum Tehrandan “Agentliklə konstruktiv əməkdaşlıq etməyi” tələb edib.

Hesabata əsasən, İranın nüvə obyektlərinə edilən hücumlardan əvvəl ölkənin əlində təxminən 440 kiloqram 60 faiz zənginləşdirilmiş uran olub. Bu səviyyə nüvə silahı istehsalı üçün tələb olunan həddə yaxın hesab edilir.

Agentlik bildirib ki, zərər görmüş obyektlərə çıxış olmadığı üçün bu ehtiyatların harada saxlanıldığını hələ də təsdiqləmək mümkün deyil. Agentliyin baş direktoru Rafael Qrossi daha əvvəl bəyan etmişdi ki, həmin materialların bir hissəsi hədəf alınmış obyektlərdə, o cümlədən İsfahandakı yeraltı mərkəzlərdə qala bilər.

Sözügedən hesabat gələn həftə Beynəlxalq Atom Enerjisi Agentliyinin İdarəçilər Şurasının iclasında müzakirə olunacaq.

GünAz TV
R.G

GUNAZ.TV

SON XƏBƏRLƏR