Şazda Bağının açılışı üçün farsdilli müğənninin seçilməsi etirazlara səbəb olub

SON XƏBƏRLƏR

Şazda Bağının açılışı üçün farsdilli müğənninin seçilməsi etirazlara səbəb olub

2026.06.10, 11:39

Təbriz Şəhər Bələdiyyəsinin Şazda Bağı (Kəlağayı/köhnə köşk) binasının açılış mərasimini farsdilli müğənni Səlar Ağilinin ifası ilə keçirmək qərarı Azərbaycanlılar arasında geniş etirazlara səbəb olub.

Gunaz.tv

Tənqidçilər mərasimdə azərbaycanlı müğənnilərin çıxış etməsini tələb edib və yerli sənətkarların nəzərə alınmamasını tənqid ediblər.

Yazıçı və Azərbaycan mədəni fəalı Qulamrza Rəzmi şəxsi hesabındakı paylaşımında Səlar Ağilinin açılış mərasimində iştirakına reaksiya verərək “azərbaycanlı sənətkarların görməzdən gəlinməsi”ni tənqid edib.

O yazıb: “Təbriz Şəhər Bələdiyyəsi Şazda Bağı açılışında Səlar Ağili və onun komandası üçün neçə milyard xərcləyib? MəgərTəbrizin öz müğənniləri yoxdurmu? Bizim dünya səviyyəli sənətkarlarımız var; niyə bu xərclər şəhərimizin sənətkarlarına dəstək olmaq əvəzinə paytaxt sənətçilərinə verilir?”

“Azer Vatan” xəbər agentliyi də bu barədə yazaraq bildirib: “Təbrizdə Şazda Bağının yenidən açılması şəhərin tarixi və mədəni yaddaşı üçün mühüm hadisədir. Bu bina Təbriz və Azərbaycanın tarixinin bir hissəsinin simvoludur və onun bərpası irsin qorunması baxımından önəmli addımdır.”

Bununla yanaşı, agentlik qeyd edib ki, Səlar Ağilinin açılışa dəvət olunması ictimaiyyətin bir hissəsində narazılıq yaradıb. Tənqidçilərin fikrincə, Azərbaycan və Təbriz kimi bölgəyə aid tarixi bir simvolun açılışında yerli türk sənətkarların ön plana çıxması daha uyğun olardı.

Şazda Bağı Təbrizin ən möhtəşəm saraylarından biri olub və Ağqoyunlu dövründə inşa edilib. Səfəvilər dövründə bəzi şahzadə toylarına ev sahibliyi edib, Qacarlar dövründə isə Abbas Mirzə tərəfindən genişləndirilib.

Pəhləvi rejimi dövründə bir çox tarixi türk abidələrinin dağıdılması zamanı Şazda Bağı da 1929-cu ildə Rza şah tərəfindən sökülüb. Təxminən 100 il sonra bu tarixi abidə Təbriz Şəhər Bələdiyyəsi tərəfindən yenidən bərpa olunub və 12 iyun cümə günü açılışı planlaşdırılıb.

Ş.A

GUNAZ.TV

SON XƏBƏRLƏR