Fars agentliyi Trampın İranla bağlı razılaşma iddiasını şübhə altına aldı

SON XƏBƏRLƏR

Fars agentliyi Trampın İranla bağlı razılaşma iddiasını şübhə altına aldı

2026.06.11, 23:43

Gunaz.tv

Gunaz TV-nin məlumatına görə, SEPAH-a yaxınlığı ilə tanınan Fars Xəbər Agentliyi Donald Trampın İranla danışıqlarda irəliləyiş əldə olunduğuna dair açıqlamasından bir neçə saat sonra “ABŞ ilə ilkin anlaşma memorandumuna dair heç bir mətn təsdiqlənməyib” iddiasını irəli sürüb.

Fars bu iddianı “İranın danışıqlar heyətinə yaxın məlumatlı mənbə”yə istinadən yayıb.

Agentlik başqa bir hesabatında isə ABŞ-ın təklif etdiyi bəzi bəndlərdən “geri çəkildiyini” iddia edib və yazıb ki, Qətər vasitəçilərinin Tehrana gəlişindən sonra Vaşinqton təklif etdiyi mətnə yeni bəndlər əlavə etməkdən imtina edib.

Fars həmçinin yazıb: “ABŞ İranın təklif etdiyi mətni qəbul etdiyinə görə, bu mətnin sistemin əsas instansiyalarında təsdiqlənməsi ehtimalı yüksəkdir.”

Bununla belə, agentlik bir neçə dəqiqə sonra xəbərin mətnində dəyişiklik edib və təsdiqlənmə ehtimalı ifadəsini çıxararaq, mətnin İran tərəfindən “yenidən nəzərdən keçirilməsi ehtimalı”ndan bəhs edib.

Bu hadisələr Donald Trampın cümə axşamı əvvəlcə İrana qarşı genişmiqyaslı hücumların həyata keçiriləcəyini bildirməsindən, lakin bir neçə saat sonra İranın “ən yüksək rəhbərlik səviyyəsi” ilə aparılan danışıqlarda irəliləyiş əldə olunduğunu əsas gətirərək həmin hücumları ləğv etdiyini açıqlamasından sonra baş verib.

GünAzTV
R.G

2026.06.11, 23:11

GUNAZ.TV

SON XƏBƏRLƏR