Güneyli vəkil Məhəmmədrza Fəqihi Evin həbsxanasından azad edilib

SON XƏBƏRLƏR

Güneyli vəkil Məhəmmədrza Fəqihi Evin həbsxanasından azad edilib

2026.06.14, 09:59

Gunaz.tv

Güney Azərbaycanlı türk vəkil Məhəmmədrza Fəqihi iyunun 13-də, şənbə günü bir il səkkiz ay həbsdə qaldıqdan sonra yenidən məhkəmə baxışı tələbinin qəbul edilməsi və “əməlin cinayət hesab edilməməsi” əsası ilə azadlığa buraxılıb.

Vəkilin azadlığa çıxması onun yenidən məhkəmə baxışı ilə bağlı müraciətinin ötən ay Ali Məhkəmənin 44-cü şöbəsi tərəfindən qəbul edilməsindən sonra baş verib. Məhəmmədrza Fəqihinin vəkilləri bildirmişdilər ki, müraciət “əməlin cinayət hesab edilməməsi” əsası ilə qəbul olunub.

Məhəmmədrza Fəqihinin azadlığa buraxılmasına baxmayaraq, onun azad edilməsi prosesi və Ali Məhkəmənin qərarının icrası ilə bağlı hələlik əlavə məlumat yayılmayıb.

İnsan haqları müdafiəçisi və Mərkəzi Vəkillər Kollegiyasının üzvü olan Məhəmmədrza Fəqihi 10 iyun 2022-ci il tarixində vəkillərin Vəkillər Kollegiyasının qarşısında keçirdiyi dinc aksiyada iştirak etdiyinə görə saxlanılmışdı. Həmin aksiya 1401-ci il etirazlarına dəstək məqsədilə keçirilmişdi.

Oxşar işlərin böyük hissəsinin əfv edilməsinə baxmayaraq, o, öhdəlik məktubunu imzalamaqdan və peşmanlığını bildirməkdən imtina edib. Nəticədə İnqilab Məhkəməsinin 15-ci şöbəsində hakim Əbülqasim Səlavatinin sədrliyi ilə keçirilən məhkəmədə “ölkənin təhlükəsizliyinə qarşı toplaşma və sövdələşmə” ittihamı ilə 5 il həbs cəzasına, 2 il vəkillik fəaliyyətindən məhrum edilməyə, 2 il ölkədən çıxış qadağasına və siyasi fəaliyyət qadağasına məhkum olunub.

Azərbaycanlı vəkil cəzasını çəkmək üçün 22 yanvar 2024-cü il tarixində Evin həbsxanasına köçürülmüşdü.

Bu azərbaycanlı vəkilin yenidən məhkəmə baxışı tələbinin qəbul edilməsi və təxminən iki illik həbsdən sonra azadlığa buraxılması siyasi fəalların işlərinə baxılması prosesi və bu kimi işlərdə təhlükəsizlik ittihamları üzrə hökmlərin verilməsi ilə bağlı sualları yenidən gündəmə gətirib.

GünAzTV
R.G

GUNAZ.TV

SON XƏBƏRLƏR