Contact Us

SON XƏBƏRLƏR

İran–ABŞ razılaşması niyə Cenevrədə imzalanacaq?

2026.06.17, 00:51
İran–ABŞ razılaşması niyə Cenevrədə imzalanacaq?

Foto: İsveçrənin Cenevrə şəhərində yerləşən dağ kurortu Burqenştok, İran və ABŞ arasında imzalanması planlaşdırılan razılaşmanın məkanı kimi göstərilir. Mərasimin cümə günü, 19 iyun tarixində keçirilməsi gözlənilir.

Gunaz.tv

Gunaz TV-nin məlumatına görə, İran və ABŞ arasında əldə olunan potensial razılaşmanın detalları hələ açıqlanmasa da, imza mərasiminin Cenevrədə keçirilməsi siyasi və diplomatik dairələrdə əsas müzakirə mövzularından birinə çevrilib.

Bildirilir ki, Pakistan tərəfi İran və ABŞ arasında müharibəyə son qoyulmasına dair razılaşmanın Cenevrədə imzalanacağını açıqlayıb. Mərasimin BMT yanında Pakistanın diplomatik nümayəndəliyində keçirilməsi ehtimal olunur, lakin bu barədə hələ rəsmi təsdiq yoxdur.

ABŞ prezidenti Donald Tramp isə “razılaşmanın tam şəkildə imzalandığını” bəyan edib və bildirib ki, ABŞ vitse-prezidenti Cey Di Vens Cenevrədə keçiriləcək rəsmi mərasimdə iştirak edəcək.

ABŞ rəsmiləri və Cey Di Vens razılaşmanın mətninin qısa və ümumi xarakter daşıdığını, detallarin isə yaxın günlərdə açıqlanacağını vurğulayıblar.

Cenevrənin seçilməsi isə beynəlxalq diplomatiyada uzun illərdir davam edən ənənə ilə izah olunur. Bu şəhər çoxillik tarixə malik olmaqla yanaşı, qlobal səviyyəli danışıqların və xüsusilə nüvə müzakirələrinin mərkəzlərindən biri kimi tanınır.

Analitiklərin fikrincə, Cenevrə İslamabaddan daha yüksək beynəlxalq statusa malikdir və danışıqlara daha geniş, qlobal xarakter qazandırır. ABŞ-ın bu şəhərdə güclü diplomatik təsir imkanları da seçimdə mühüm rol oynayıb.

Eyni zamanda İsveçrə bu prosesdə vasitəçi rolunu gücləndirmək və diplomatik imkanlarını nümayiş etdirmək üçün bu mərasimdən istifadə etməyə çalışır.

Bəzi mənbələr isə bildirir ki, mərasimin Pakistan nümayəndəliyində keçirilməsi ehtimalı İslamabadın uzunmüddətli vasitəçilik rolu ilə bağlıdır.

Məlumata görə, mümkün mərasimdə İran nümayəndə heyətinə Məhəmmədbaqir Qalibaf, Abbas Əraqçi və digər siyasi və təhlükəsizlik rəsmiləri daxil olacaq.

 

GünAzTV
R.G

Açar Sözlər :

SEÇİLMİŞ XƏBƏRLƏR

Çox oxunanlar