ABŞ Türkiyənin Halkbank işi üzrə dosyesini bağladı

SON XƏBƏRLƏR

ABŞ Türkiyənin Halkbank işi üzrə dosyesini bağladı

2026.06.17, 18:27

ABŞ məhkəməsi Halkbanka qarşı irəli sürülən ittihamları ləğv edib.

Gunaz.tv

ABŞ illərdir Türkiyənin dövlət bankı olan Halkbankı İrana sanksiyaları aşmağa kömək etməkdə ittiham edirdi. İndi isə Vaşinqtonla bank arasında əldə olunan razılaşmadan sonra iş bağlanıb, banka cərimə tətbiq olunmayıb və o, bundan sonra İranın xeyrinə heç bir maliyyə əməliyyatı aparmayacağını öhdəsinə götürüb.

Gunaz TV-nin məlumatına görə, ABŞ federal məhkəməsi Türkiyənin dövlət bankı olan Halkbanka qarşı cinayət işinin bağlandığını elan edib və bununla da banka qarşı illərlə davam edən hüquqi prosesə son qoyulub.

Halkbank 2019-cu ildən etibarən İrana ABŞ sanksiyalarını aşmağa yardım etməkdə ittiham olunurdu. Amerikalı prokurorlar bankın İran neft satışları ilə əlaqəli milyardlarla dollar vəsaiti müxtəlif maliyyə şəbəkələri və əməliyyatlar vasitəsilə köçürdüyünü iddia edirdilər.

Lakin Donald Tramp administrasiyası mart ayında Halkbankla razılıq əldə edib və məhkəmə də bu razılaşma əsasında ittiham aktını ləğv edib.

Yeni razılaşmaya əsasən, Halkbank İranın xeyrinə hər hansı maliyyə əməliyyatı həyata keçirməyəcəyini öhdəsinə götürüb. Bankın fəaliyyəti həmçinin sanksiyalara və maliyyə qaydalarına əməl olunmasını yoxlamaq üçün müstəqil nəzarətçi tərəfindən izlənəcək.

Bunun müqabilində ABŞ işi bağlayıb, Türkiyə bankı isə heç bir cinayət əməlini etiraf etməyib.

Bu dosye uzun illər Ankara ilə Vaşinqton arasında gərginlik yaradan məsələlərdən biri hesab olunurdu və onun bağlanması iki ölkə arasındakı münasibətlərdə gərginliyin azalmasına kömək edə bilər.

GünAzTV
R.G

GUNAZ.TV

SON XƏBƏRLƏR