Müctəba Xamenei ABŞ-la razılaşmadan kənara çəkildi

SON XƏBƏRLƏR

Müctəba Xamenei ABŞ-la razılaşmadan kənara çəkildi

2026.06.18, 21:30

Müctəba Xamenei ABŞ və İran arasında imzalanan memorandumla razı olmadığını, lakin onun icrasına icazə verdiyini bildirib. ABŞ-la razılaşmanın imzalandığı bir vaxtda İranın görünməyən lideri “başqa fikrim var idi” deyir.

Gunaz.tv

Gunaz TV-nin məlumatına görə, illərlə İran rəsmiləri ABŞ ilə danışıqları “qırmızı xətt” və “düşmənə təslim olmaq” kimi təqdim etdikləri halda, indi Müctəba Xamenei Tehran və Vaşinqton arasında imzalanan memorandumla bağlı yaydığı mesajda bu razılaşma barədə “başqa fikrə sahib olduğunu”, lakin sonda onun icrasına razılıq verdiyini açıqlayıb.

Mesajın dərc olunan mətninə əsasən, Müctəba Xamenei razılaşmanın siyasi məsuliyyətini və mümkün nəticələrini Məsud Pezeşkianın və Ali Milli Təhlükəsizlik Şurasının üzvlərinin üzərinə qoyaraq, onların bu qərarın məsuliyyətini qəbul etdiklərini vurğulayıb.

Mesajın bir hissəsində bildirilir ki, o, prezidentin və Ali Milli Təhlükəsizlik Şurası üzvlərinin “İran xalqının və müqavimət cəbhəsinin hüquqlarının qorunacağı” ilə bağlı öhdəlik götürməsinə görə memorandumun icrasına icazə verib.

Bu mövqe bir çox müşahidəçilər tərəfindən razılaşmanın mümkün nəticələrindən uzaqlaşmaq cəhdi kimi qiymətləndirilir. Sözügedən razılaşma 40 günlük müharibədən və İranın üzləşdiyi ağır iqtisadi və hərbi itkilərdən sonra əldə olunub.

Eyni zamanda, prezidentin icraçı müavini Cəfər Qaimpənah bildirib ki, İran–ABŞ memorandumuna Ali Milli Təhlükəsizlik Şurasının üzvlərindən yalnız bir nəfər istisna olmaqla hamısı razılıq verib.

Məlumatlara görə, ilkin planda memorandumun Məhəmmədbaqir Qalibaf və ABŞ vitse-prezidenti Cey Di Vens tərəfindən imzalanması nəzərdə tutulurdu. Lakin sonda sənəd iki ölkənin prezidentləri – Məsud Pezeşkian və Donald Tramp tərəfindən elektron şəkildə imzalanıb.

İran hakimiyyətinin tənqidçiləri bildirirlər ki, illərlə anti-Amerika şüarları səsləndirən və regional siyasətlərə milyardlarla dollar xərcləyən rejim indi iqtisadi və siyasi böhranlardan çıxmaq üçün Vaşinqtonla razılaşmağa məcbur qalıb. Bununla yanaşı, hakimiyyət bu qərarın tam məsuliyyətini üzərinə götürməməyə və mümkün siyasi xərcləri digər qurum və rəsmilərin üzərinə yönəltməyə çalışır.

GünAzTV
R.G

GUNAZ.TV

SON XƏBƏRLƏR