Reuters: SEPAH Körfəz ölkələrinə hücumlar üçün İraqda yeni gizli qruplar yaradıb

SON XƏBƏRLƏR

Reuters: SEPAH Körfəz ölkələrinə hücumlar üçün İraqda yeni gizli qruplar yaradıb

2026.06.19, 10:19

Səkkiz iraqlı mənbənin Reuters agentliyinə verdiyi məlumata görə, İran İslam İnqilabı Keşikçiləri Korpusu (SEPAH) ABŞ qüvvələrinin yerləşdiyi Körfəz ölkələrinə hücumlar həyata keçirmək üçün İraqda yeni gizli qruplar yaradıb.

Gunaz.tv

Mənbələrdən üçünün sözlərinə görə, hər biri təxminən 10 nəfərdən ibarət olan üç və ya dörd qrup aprelin 20-dən mayın 17-dək Bəsrə və Səmava şəhərləri yaxınlığındakı səhra bölgələrindən Küveyt, Səudiyyə Ərəbistanı və Birləşmiş Ərəb Əmirliklərindəki hədəflərə qarşı azı yeddi pilotsuz uçuş aparatı hücumu həyata keçirib.

Məlumata görə, qrupların bəzi üzvləri minlərlə döyüşçünü birləşdirən sərt xətt tərəfdarı şiə fraksiyalarının çətir təşkilatı olan “İraqda İslam Müqaviməti”ndən seçilib.

Mənbələr bildirib ki, bu yeni qrupların yaradılması SEPAH taktikasında dəyişiklikdən xəbər verir. Məqsəd İranın silahlı proksi qüvvələrinin zəiflədiyi, ölkənin hərbi və iqtisadi resurslarının tükəndiyi bir vaxtda regionda təsir imkanlarını qoruyub saxlamaqdır.

Xatırladaq ki, Bir neçə güclü şiə fraksiyası ötən ildən etibarən ABŞ Prezidenti Donald Tramp administrasiyası ilə gərginliyin artmasının qarşısını almaq məqsədilə silahları yerə qoymağa və diqqəti daxili siyasətə yönəltməyə hazır olduqlarını bildirirlər.

Təqaüddə olan iraqlı general Casim əl-Bəhədli və hakim şiə koalisiyasından iki deputatın fikrincə, məhz bu proses SEPAH-ı birbaşa öz nəzarəti altında olan yeni qruplar yaratmağa sövq etmiş ola bilər.

İran Xarici İşlər Nazirliyi və ölkənin Nyu-York və Cenevrədəki BMT nümayəndəlikləri bu məqalə ilə bağlı ətraflı suallara cavab verməyiblər.

ABŞ Dövlət Departamenti isə “İraq hökumətinin İranın İraqdakı sabitliyi pozan fəaliyyətlərinin bütün alətlərini, o cümlədən SEPAH və İrana bağlı terrorçu silahlı qrupları dərhal ləğv etmək üçün tədbirlər görməsini gözlədiyini” təkrarlayıb.

Üç iraqlı təhlükəsizlik mənbəsinin bildirdiyinə görə, münaqişə dövründə İraqda yaranan və çox vaxt az tanınan adlar altında fəaliyyət göstərən yeni qruplar Küveytə qarşı ən azı üç, Səudiyyə Ərəbistanına qarşı iki və BƏƏ-yə qarşı iki PUA hücumu həyata keçirib. Bu məlumatlar insan kəşfiyyatı, ələ keçirilmiş rabitə siqnalları və buraxılış məntəqələrindən əldə olunan sübutlara əsaslanır.

Mənbələrin sözlərinə görə, hədəflər arasında ABŞ qüvvələrinin yerləşdiyi Küveytin Əli əl-Salem Hərbi Hava Bazası və ölkənin beynəlxalq hava limanındakı hərbi terminal da olub. Səudiyyə Ərəbistanı və BƏƏ-yə yönəlmiş hücumlar isə qarşısı alınaraq zərərsizləşdirilib.

- Cəfər Cəfərli

GUNAZ.TV

SON XƏBƏRLƏR