İran universitetlərində sosial xidmətlər ləğv edilir

SON XƏBƏRLƏR

İran universitetlərində sosial xidmətlər ləğv edilir

2026.06.27, 20:30

Gunaz.tv

İranın 34 universitetinin tələbə şuraları tələbə yeməkxanalarının ləğvi və universitetlərdə sosial xidmətlərin dəyişdirilməsi planına qarşı xəbərdarlıq edib. Şuralar bildiriblər ki, bu addım tələbələrin yaşayış xərclərini daha da artıra bilər.

Birgə bəyanatda qeyd olunub ki, yeni plana əsasən universitetlərin mərkəzi yeməkxanaları mərhələli şəkildə xidmət sistemindən çıxarılacaq və yemək subsidiyası tələbələrə birbaşa kredit formasında veriləcək. Tələbələr isə qidalarını müqaviləli restoran və mərkəzlərdən almalı olacaqlar.

Tələbə şuraları vurğulayıb: “Bu qərar yalnız yeməyin bölüşdürülməsi üsulunda dəyişiklik deyil” və bunu son illərdə büdcənin idarə olunması bəhanəsi ilə sosial xidmətlərin azaldılması siyasətinin davamı kimi qiymətləndiriblər.

Onlar həmçinin bildiriblər: “Büdcənin idarə olunması məsələsi yalnız bəhanədir və əsas məqsəd tələbələrin bütün sosial xidmətlərinin mərhələli şəkildə ləğv edilməsidir.”

Yeni plana əsasən, növbəti semestrdən etibarən ölkə üzrə tələbə yeməkxanalarının ləğv edilməsi və əvəzində tələbələrə yemək xərcləri üçün müəyyən məbləğin ödənilməsi nəzərdə tutulur. Bu addım yüksək inflyasiya şəraitində tələbələrin iqtisadi yükünün artacağı ilə bağlı narahatlıqlar yaradıb.

Tənqidçilər bildirirlər ki, İran son illərdə universitet və elmi araşdırmalara ayrılan büdcəni azaldıb, daha çox vəsaiti hərbi və təhlükəsizlik strukturlarına yönəldib. Onların fikrincə, bu siyasət elmi mərkəzlərin zəifləməsinə və tələbə, alim və mütəxəssislərin ölkədən getməsinin artmasına səbəb olub.

GünAzTV
R.G

GUNAZ.TV

SON XƏBƏRLƏR