ABŞ İrana yeni hücumlara başladı

SON XƏBƏRLƏR

ABŞ İrana yeni hücumlara başladı

2026.07.09, 01:26

CENTCOM İrana qarşı yeni hücumların başladığını təsdiqlədi.

Gunaz.tv

Gunaz TV-nin məlumatına görə, ABŞ Silahlı Qüvvələrinin Mərkəzi Komandanlığı (CENTCOM) cümə axşamına keçən gecə İrandakı hədəflərə qarşı yeni hücum mərhələsinin başladığını təsdiqləyib. Eyni vaxtda İran mediası ölkənin cənubunda çoxsaylı partlayışların baş verdiyini bildirib.

CENTCOM sosial şəbəkə X-də yaydığı açıqlamada bildirib: “Ali Baş Komandanın əmri ilə CENTCOM qüvvələri İranın Hörmüz boğazında azad gəmiçiliyi təhdid etmək imkanlarını zəiflətmək məqsədilə növbəti hücumlara başlayıb.”

Bəyanatda həmçinin qeyd olunub ki, ABŞ İranı beynəlxalq əhəmiyyət daşıyan su yolunda ticarət gəmilərinə və onların mülki heyətinə qarşı həyata keçirilən “son əsassız hücumlara” görə məsul hesab edir.

Bu arada İran xəbər agentlikləri Bəndər Abbasda, Kənərək, Çabahar, Sirik və Buşəhr əyalətində bir neçə partlayış səsinin eşidildiyini bildiriblər. İran dövlət televiziyasının məlumatına görə, Əbu Musa adasında da partlayışlar baş verib.

İRNA xəbər agentliyi partlayışlardan sonra Çabahar şəhərinin bəzi hissələrində elektrik enerjisinin kəsildiyini xəbər verib. İran dövlət televiziyası həmçinin ABŞ mərmilərinin qəlpələrinin Çabahardakı İmam Əli xəstəxanasına düşdüyünü iddia edib. Hadisə nəticəsində mümkün itkilər və ya dağıntılar barədə hələlik məlumat verilməyib.

Bununla yanaşı, Nour News məlumatlı mənbələrə istinadən bildirib ki, Buşəhr əyalətinə edilən hücumlara baxmayaraq, Buşəhr Atom Elektrik Stansiyası zərər görməyib.

Digər tərəfdən, Nour News İranın hərbi mənbələrinə istinadla ABŞ-ın bölgədəki hərbi bazalarına qarşı “ağır və qaçılmaz hücumların” planlaşdırıldığını iddia edib.

Eyni zamanda İsrailin KAN ictimai yayım qurumu ABŞ-ın yeni əməliyyata başlamazdan əvvəl İsraili məlumatlandırdığını bildirib. Məlumata görə, bu addım İsrailin İranın mümkün cavab hücumlarına hazır olması məqsədi daşıyıb.

Bu hücumlar ABŞ Prezidenti Donald Trampın NATO liderlərinin Ankaradakı sammiti çərçivəsində verdiyi açıqlamadan sonra başlayıb. Tramp bildirmişdi ki, ABŞ-ın çərşənbə gecəsi də İrandakı hədəflərə yeni zərbələr endirməsi ehtimalı var.

Gunaz TV
R.G

GUNAZ.TV

SON XƏBƏRLƏR