Minlərlə dənizçi Hörmüz boğazında köməksiz qalıb

SON XƏBƏRLƏR

Minlərlə dənizçi Hörmüz boğazında köməksiz qalıb

2026.07.24, 17:26

BMT minlərlə dənizçinin təcili xilas edilməsinə çağırış edib.

Gunaz.tv

Gunaz TV-nin məlumatına görə, Birləşmiş Millətlər Təşkilatı (BMT) Hörmüz boğazında qalan minlərlə dənizçinin vəziyyəti ilə bağlı xəbərdarlıq edərək, onların təxliyəsi və ölkələrinə qaytarılması üçün təcili tədbirlər görülməsini istəyib.

BMT-nin İnsan Hüquqları üzrə Ali Komissarının sözçüsü Şabiya Mantu bildirib ki, Volker Türk bu dənizçilərin vəziyyətini “humanitar və insan hüquqları baxımından ağır böhran” kimi qiymətləndirib və dövlətləri, gəmi sahiblərini, eləcə də münaqişə tərəflərini onların təhlükəsizliyinin təmin edilməsi üçün təcili addımlar atmağa çağırıb.

Beynəlxalq Dənizçilik Təşkilatının məlumatına görə, ən azı 6 min dənizçi yüzlərlə gəmidə Hörmüz boğazında çıxılmaz vəziyyətdə qalıb. Onlar hətta İran, ABŞ və İsrail arasında qüvvədə olan atəşkəs dövründə belə təxliyə edilərək ölkələrinə qaytarıla bilməyiblər. Bildirilir ki, daha çox dənizçinin taleyi barədə isə hələ də məlumat yoxdur.

BMT hökumətləri dənizçilərə konsulluq xidmətlərinin göstərilməsi, zəruri ehtiyaclarının təmin edilməsi və onların ölkələrinə təhlükəsiz şəkildə qaytarılması üçün lazımi tədbirlər görməyə çağırıb.

BMT-nin İnsan Hüquqları üzrə Ali Komissarının sözçüsü həmçinin vurğulayıb: “Mülki gəmilərə hücum qəbuledilməzdir və dayandırılmalıdır. Bu gəmilər beynəlxalq humanitar hüquqa əsasən qorunur.”

Onun sözlərinə görə, qarşıdurmalar başlayandan bəri azı 17 dənizçi həyatını itirib. BMT-nin İnsan Hüquqları Ofisi həmçinin bildirib ki, bəzi gəmi sahibləri ekipaj üzvlərini heç bir dəstək göstərmədən, ölkələrinə qayıtmaq və ya əməkhaqlarını almaq imkanı olmadan dənizdə taleyin ümidinə buraxıblar.

GunAz TV
R.G

GUNAZ.TV

SON XƏBƏRLƏR