Milli fəallar Ərdəbil həbsxanasında qanunsuz saxlanılır

SON XƏBƏRLƏR

Milli fəallar Ərdəbil həbsxanasında qanunsuz saxlanılır

2026.08.01, 09:00

Ərdəbil həbsxanasında qeyri-müəyyən vəziyyətdə saxlanılan milli fəallar Əli Vasiqi, Əsgər Əkbərzadə və Siyamək Mirzayinin barələrində çıxarılan 1 aylıq qətimkan qərarı başa çatıb.

Gunaz.tv

Bu haqda adı çəkilən məhbusların ailəsinə yaxın mənbələr bildiriblər.

Onların sözlərinə görə, buna baxmayaraq, fəallar səbəbsiz həbsdə saxlanılır və barələrində irəli sürülən ittihamlar da elan edilmir.

"Fəalların məhkəməyə qədər sərbəst buraxılmalarına görə girov qoyulması üçün inzibati addımları tamamlamaq məqsədilə Ərdəbil Dövlət və İnqilab Prokurorluğunun 10-cu İstintaq Şöbəsinə getdik. Ancaq iş üzrə müstəntiq Həsən Kərimi həbs qərarının girov qərarına çevrilməsinə razı olmadı və işin hələ prokurorluğa göndərilmədiyini bildirdi",- məhbusların yaxınları bildirib.

Onların sözlərinə görə, iş üzrə müstəntiq həmçinin bildirib ki, Kəşfiyyat İdarəsi və məhkəmə işçiləri razılıqlarını bildirənə qədər fəalların girov qarşılığında sərbəst buraxılması mümkün olmayacaq.

Müstəntiq bundan əvvəl isə ailələrə bir aylıq həbs müddəti bitdikdən və girov qoyulduqdan sonra məhbusların müvəqqəti azadlığa buraxılma ehtimalının təmin ediləcəyini bildirmişdi.

Mənbə həmçinin qeyd edib ki, Siyamək Mirzayi, Əsəgr Əkbərzadə və Əli Vasiqi ailələri ilə qısa telefon danışığında həbsxanada saxlanılma şərayitlərinin ağır olduğunu bildiriblər.

Qeyd edək ki, iyunun 28-də Siyamək Mirzayi Xiyavda (Meşgin), Əsgər Əkbərzadə və Əli Vaseqi isə Ərdəbildə həbs edilib.

Hər üç fəal bundan əvvəl də dinc mədəni fəaliyyətlərinə görə saxlanılıblar.

GünAzTV

GUNAZ.TV

SON XƏBƏRLƏR