Contact Us

SON XƏBƏRLƏR

İranda doğum sayı son 66 ilin ən aşağı səviyyəsinə düşdü

2026.08.02, 16:34
İranda doğum sayı son 66 ilin ən aşağı səviyyəsinə düşdü

Doğum sayı tarixi minimuma düşdü; Əhali sürətlə qocalır. Demoqraflardan ciddi xəbərdarlıq.

Gunaz.tv

İranda doğum göstəricisi tarixi minimuma enib; ölkədə son 66 ilin ən az körpəsi dünyaya gəlib.

Gunaz TV-nin məlumatına görə, İran Vətəndaş Vəziyyəti Aktlarının Qeydiyyatı Təşkilatının rəsmi statistikası ölkədə doğum sayının son 66 ilin ən aşağı səviyyəsinə endiyini göstərir. Məlumata əsasən, ötən il İranda cəmi 892 min 280 uşaq dünyaya gəlib. Bu, 1960-cı ildən bəri qeydə alınan ən aşağı doğum göstəricisidir.

2025-ci il ardıcıl ikinci il olub ki, İranda doğulan uşaqların sayı bir milyondan aşağı düşüb. Halbuki 1980-ci illərdə, əhalinin sürətlə artdığı dövrdə, ölkədə illik doğum sayı iki milyonu ötürdü.

Eyni zamanda, ümumi doğum əmsalı da son təxminən 70 ilin ən aşağı səviyyəsinə enib. Hər min nəfərə düşən doğum sayı ötən il 10 olub. Müqayisə üçün qeyd edək ki, 1950-ci illərin ortalarında bu göstərici təxminən 19 idi.

Rəsmi statistikaya əsasən, 2025-ci ildə İranda 451 min 798 ölüm halı qeydə alınıb. Ölüm əmsalı hər min nəfərə 5,3 olsa da və tarixi orta göstəricilər çərçivəsində qalsa da, ölənlərin sayı koronavirus pandemiyasından əvvəlki illərlə müqayisədə hələ də yüksək olaraq qalır.

Narahatlıq doğuran digər göstərici isə doğumla ölüm arasındakı nisbətin sürətlə azalmasıdır. 1980-ci illərdə hər bir ölüm halına qarşı təxminən 10 doğum düşürdüsə, 2025-ci ildə bu göstərici son 70 ildə ilk dəfə iki doğumdan aşağı enib. Bu isə əhalinin qocalması prosesinin sürətləndiyini göstərir.

Demoqrafiya üzrə mütəxəssislər xəbərdarlıq edirlər ki, bu tendensiyanın davam etməsi yaşlı əhalinin artmasına, əmək qabiliyyətli əhalinin azalmasına, pensiya fondlarına əlavə yükün düşməsinə, səhiyyə və sosial təminat xərclərinin yüksəlməsinə, eləcə də iqtisadi inkişafın zəifləməsinə səbəb ola bilər.

Bu statistika nikahların sayının da son illərdə azaldığı bir dövrdə açıqlanıb. Mütəxəssislər iqtisadi problemləri, yüksək inflyasiyanı, yaşayış xərclərinin artmasını, mənzil təminatındakı çətinlikləri, gələcəklə bağlı qeyri-müəyyənliyi, həyat tərzinin dəyişməsini və gənc ailələrin uşaq sahibi olmaq istəyinin azalmasını doğum səviyyəsinin davamlı enməsinin əsas səbəbləri kimi göstərirlər.

 


GunAz TV
R.G
 

Açar Sözlər :

SEÇİLMİŞ XƏBƏRLƏR

Çox oxunanlar