15 ölkədə yaşayan 121 Güney Azərbaycanlı siyasi, sivil və akademik fəal Güney Azərbaycandakı siyasi məhbusların vəziyyətinin izlənilməsini tələb etdi

SON XƏBƏRLƏR

15 ölkədə yaşayan 121 Güney Azərbaycanlı siyasi, sivil və akademik fəal Güney Azərbaycandakı siyasi məhbusların vəziyyətinin izlənilməsini tələb etdi

2026.08.16, 10:16

Gunaz.tv

Xaricdə yaşayan bir qrup Güney Azərbaycanlı siyasi və sivil fəal, akademik və ziyalı birgə bəyanat yayaraq, İranda yaşayan Türk sivil və siyasi fəalların vəziyyəti ilə bağlı dərin narahatlıqlarını ifadə edib və onların fundamental hüquq və azadlıqlarına tam şəkildə riayət olunmasını tələb edib.

15 ölkədə yaşayan 121 nəfərin imzaladığı bəyanatda İranın müxtəlif əyalətlərində Türk fəallara qarşı həbslərin, çağırışların və ağır hökmlərin artmasına diqqət çəkilib. Bildirilib ki, çox sayda fəal “ölkənin təhlükəsizliyinə qarşı cinayət törətmək məqsədilə toplaşmaq və əlbir olmaq” və “rejim əleyhinə təbliğat aparmaq” kimi ittihamlarla təqib edilir, mühakimə olunur və ya məhkum edilir.

İmzaçılar həmçinin bu işlər üzrə məhkəmə proseslərindən narahatlıqlarını ifadə ediblər. Vəkilə çıxış imkanlarının məhdudlaşdırılması, iş materiallarının kifayət qədər araşdırılmaması, effektiv müdafiə hüququndan məhrum edilmə və təhlükəsizlik qüvvələrinin təzyiqləri ilə bağlı məlumatlar ədalətli məhkəmə prinsiplərinə riayət olunması baxımından narahatlıq doğuran məsələlər kimi qeyd edilib. Bəyanatda bəzi həbsdə olan fəalların səhhəti ilə bağlı yayılan məlumatlara da diqqət çəkilərək, onların lazımi tibbi xidmətlərə çıxışında mövcud problemlərlə bağlı xəbərdarlıq edilib.

Bəyanatda vurğulanıb ki, dinc sivil və mədəni fəaliyyətlər cinayət təqibinə məruz qalmamalıdır. Həmçinin xatırladılıb ki, İran İslam Respublikası qoşulduğu beynəlxalq sənəd və müqavilələrdən irəli gələn öhdəliklərə əsasən, ədalətli məhkəmə hüququ, ifadə azadlığı, dinc toplaşmaq və təşkilatlanmaq azadlığı, eləcə də tibbi xidmətlərdən yararlanmaq hüququ kimi fundamental hüquqlara riayət etməyə borcludur.

İmzaçılar həmçinin dövlətlərə, Birləşmiş Millətlər Təşkilatının xüsusi məruzəçilərinə, BMT-nin İran üzrə Faktaraşdırıcı Missiyasına, beynəlxalq insan hüquqları qurumlarına və digər aidiyyəti beynəlxalq mexanizmlərə müraciət edərək, İrandakı Güney Azərbaycan Türk fəallarının vəziyyətini yaxından izləməyi, onların işləri üzrə məhkəmə proseslərini nəzarətdə saxlamağı və fundamental hüquqlarının təmin edilməsi üçün mövcud bütün hüquqi və diplomatik imkanlardan istifadə etməyi tələb ediblər.

Üç dildə — ingilis, Türk və fars dillərində hazırlanan bu bəyanat dünyanın 15 müxtəlif ölkəsində yaşayan 121 Güney Azərbaycan Türkü siyasi və sivil fəal, akademik və ziyalı tərəfindən imzalanıb.

Bəyanatın tam mətni və imzaçıların adları ilə aşağıdakı keçiddən tanış olmaq mümkündür:

https://gunaz.tv/az/post/142168

İrandakı Azərbaycanlı Mədəni və Siyasi Fəalların Vəziyyətinə Dair Bəyanat

GünAz TV

GUNAZ.TV

SON XƏBƏRLƏR