Tikantəpəli körpə “Elxan” adı ilə doğum haqqında şəhadətnaməsiz qalıb

SON XƏBƏRLƏR

Tikantəpəli körpə “Elxan” adı ilə doğum haqqında şəhadətnaməsiz qalıb

2026.08.22, 11:54

Tehran əyalətinin Rəbat Kərim şəhər Qeydiyyat İdarəsi əslən Tikantəpədən olan azərbaycanlı ailənin övladına “Elxan” adı ilə doğum haqqında şəhadətnamə verməkdən artıq 20 gündür imtina edir.

Gunaz.tv

Uşağın atası Səccad Yektaayi Yolğun-Ağac Balamın Adı kampaniyasına danışıb.

"Oğlumuz 2026-cı ilin 2 avqust tarixində anadan olub və ona Elxan adını vermişik. Lakin Rəbat Kərim Qeydiyyat İdarəsinin əməkdaşları doğum haqqında şəhadətnamə verməkdən imtina edərək bildiriblər: ‘Adın həmzəli olması və sistemdə mövcud olmaması səbəbindən onu qeydiyyata ala bilmirik. Yalnız İlhən və ya İlhan formasında qeydiyyata almaq mümkündür.’”

“Biz də hüquqlarımızı müdafiə etmək üçün Ölkə Baş Təftiş İdarəsinə şikayət etdik. Bu qurum da Qeydiyyat İdarəsindən müraciətimizə baxılmasını tələb etdi. Lakin Qeydiyyat İdarəsi körpəmizin adının qeydiyyata alınmasına yenidən etiraz edərək belə cavab verdi: ‘Konstitusiyanın 15-ci maddəsinə əsasən, İran xalqının rəsmi və ortaq dili fars dilidir və sənədlər, yazışmalar və rəsmi mətnlər bu dil və əlifba ilə tərtib edilməlidir. Elxan türk yazılışıdır; istənildiyi təqdirdə oğlan uşaqları üçün farsca yazılışla “İlhən” formasında seçilə bilər.’”

Halbuki Konstitusiyanın 15-ci maddəsində daha sonra bildirilir: “Yerli və etnik dillərdən mətbuatda və kütləvi informasiya vasitələrində istifadə edilməsi, habelə məktəblərdə onların ədəbiyyatının fars dili ilə yanaşı tədrisi sərbəstdir.”

Buna baxmayaraq, Qeydiyyat İdarəsi bu qanunu seçmə və natamam şəkildə şərh edərək uşağımıza istədiyimiz adı vermək kimi ən fundamental hüquqlarımızdan birini əlimizdən almağa çalışır.

Xatırladaq ki, Qeydiyyat İdarəsi türk adlarının “həmzəli olması” və “türk yazılışında olması” kimi bəhanələrlə doğum haqqında şəhadətnamə verməkdən imtina edir. Halbuki “Faizə”, “Faiqə” və “Maidə” kimi həmzəli, lakin qeyri-türk adlarına heç bir problem olmadan şəhadətnamə verilir.

Uşaqların şəxsiyyətsiz qalması bir sıra ciddi nəticələrə səbəb olur. Bunlara sığorta, peyvənd və tibbi xidmətlərdən məhrum qalmaq, valideynlərin dövlət subsidiyaları və Ədalət Səhmlərini (Səhame Edalat) alma imkanının məhdudlaşması, ailənin üzərinə əlavə xərclərin düşməsi, həmçinin valideynlər üçün stress və psixoloji təzyiq daxildir.

Ş.A

GUNAZ.TV

SON XƏBƏRLƏR