Tehran daha bir səfirlik fəaliyyətini dayandırır

SON XƏBƏRLƏR

Tehran daha bir səfirlik fəaliyyətini dayandırır

2026.08.23, 23:51

ABŞ sanksiyalarından bir gün əvvəl: Çili Tehrandan geri çəkilir.

Gunaz.tv

Cənubi Amerikada yerləşən Çili ölkəsi təhlükəsizlik və iqtisadi səbəblərlə Tehrandakı səfirliyini bağlayacaq. Çilinin Xarici İşlər Nazirliyi səfirliyin bu ayın sonunadək fəaliyyətini dayandıracağını açıqlayıb.

GünAz TV-nin məlumatına görə; Çilinin Xarici İşlər Nazirliyi səfirliyin bağlanmasının İranla diplomatik əlaqələrin kəsilməsi anlamına gəlmədiyini vurğulayıb.

Çili hökuməti bu qərarın səbəbini “mövcud resursların səmərəli bölüşdürülməsi və Yaxın Şərqdə təhlükəsizlik amillərinin nəzərə alınması məqsədilə əməliyyatların yenidən təşkil edilməsi” kimi açıqlayıb.

Çilinin Xarici İşlər Nazirliyi İrandakı vətəndaşlarına konsulluq və inzibati xidmətlər üçün Ankaradakı Çili səfirliyinə müraciət edə biləcəklərini bildirib.

İran və Çili 84 ildir diplomatik əlaqələrə malikdir. Xose Antonio Kastın Çili prezidentliyinə gəlməsindən sonra bu ölkə ABŞ-la əlaqələrin genişləndirilməsini xarici siyasətinin prioritet istiqamətlərindən birinə çevirib.

Yaxın Şərqdə qarşıdurmaların genişlənməsi və İran İslam İnqilabı Keşikçiləri Korpusunun region ölkələrinə hücumlarının artmasından sonra Çili prezidenti bəyanat yayaraq deyib: “Çili həmişə azadlıq və demokratiyanı təşviq edən ölkələrin müttəfiqi olmalıdır və bu ölkə İran rejiminin regionun bir sıra ölkələrinə qarşı ayrı-seçkisiz hücumlarını pisləyir.”

Çilinin Tehrandakı səfirliyini bağlayacağına dair açıqlama ABŞ-ın İrana qarşı yeni sanksiyalarının qüvvəyə minməsindən bir gün əvvəl verilib. ABŞ prezidenti Donald Tramp daha əvvəl dünyanın bütün ölkələrini İrana qarşı yeni ABŞ sanksiyalarına qoşulmağa çağırıb.

GünAz TV
R.G

GUNAZ.TV

SON XƏBƏRLƏR