Müctəba Xameneinin Londondakı iki dəbdəbəli penthausu satışa çıxarılıb

SON XƏBƏRLƏR

Müctəba Xameneinin Londondakı iki dəbdəbəli penthausu satışa çıxarılıb

2026.09.06, 13:32

Müctəba Xameneiyə bağlı olduğu bildirilən Londondakı iki dəbdəbəli penthaus təxminən 36 milyon funt sterlinq ümumi qiymətlə satışa çıxarılıb.

Gunaz.tv

GunAzTV-nin məlumatına görə, “Sunday Times” qəzeti bu iki əmlakın Kensinqton rayonunda və İsrail səfirliyinin yaxınlığında yerləşdiyini, 2014 və 2016-cı illərdə Əli Ənsari tərəfindən alındığını yazıb. İki əmlakın ümumi alış qiymətinin təxminən 35,7 milyon funt sterlinq olduğu bildirilir.

Qəzetin yazdığına görə, Kensinqton sarayının, yəni Uels şahzadəsi və şahzadəsinin Londondakı rəsmi iqamətgahının yaxınlığında yerləşən bu əmlakların mövqeyi Tehran rejiminin Britaniya elitası arasında gizli təsirinin səviyyəsini göstərir.

İki penthaus dəbdəbəli şəraitə, əməkdaşlar üçün ayrıca yaşayış sahəsinə və şəxsi dam terraslarına malikdir. Əmlaklardan Kensinqton sarayı kompleksinə mənzərə açılır.

Dubayda yaşayan iranlı bankir və investor Əli Ənsari bu ilin iyulunda ABŞ tərəfindən sanksiyaya məruz qoyulub. ABŞ Maliyyə Nazirliyi onu Müctəba Xameneinin və İranın digər yüksək səviyyəli rəsmilərinin maliyyələşdirilməsində, həmçinin aktivlərin müxtəlif ölkələrdə, o cümlədən Britaniyada şirkətlər və ofşor strukturlar şəbəkəsi vasitəsilə saxlanılmasında ittiham edib.

Britaniya da daha əvvəl Ənsarini SEPAH-ın fəaliyyətinin maliyyələşdirilməsində rol oynadığına görə sanksiyaya məruz qoyub.

“Sunday Times”ın yazdığına görə, Ənsari sanksiyaya məruz qaldıqdan və bu əmlaklarla bağlı kredit ödənişlərində problem yarandıqdan sonra özəl kreditorlar tərəfindən satış üçün idarəçilər təyin edilib. Əmlakların satışı Britaniya hökumətinin icazəsi ilə həyata keçirilir və satışdan əldə olunan gəlir Ənsari sanksiya altında olduğu müddətdə dondurulacaq.

GunAzTV
R.G

GUNAZ.TV

SON XƏBƏRLƏR