Mərhum Həsən Dəmirçi ailəsindən Azərbaycan əhalisinə qədirdanlıq və təşəkkür mesajı

SON XƏBƏRLƏR

Mərhum Həsən Dəmirçi ailəsindən Azərbaycan əhalisinə qədirdanlıq və təşəkkür mesajı

2021.10.20, 07:36

Gunaz.tv

GünAz TV: Ötən günlərdə Təbrizin “Ali nəsəb” xəstəxanasında vəfat edən tanınmış azərbaycanlı milli-mədəni fəal və musiqi ustadı Həsən Dəmirçinin (Həsən Azərbaycan) ailəsi mərhumun dəfn və 3 mərasimində aktiv iştirak etdiklərinə görə Azərbaycan əhalisinə öz təşəkkürünü bildirib.

Ailənin qədirdanlıq mesajı şənbə günü iyunun 30-da yayılıb.

““Kimlər gəldi, kimlər getdi bu dünyadan, bu dünyadan

Arif olan nakam getməz bu dünyadan, bu dünyadan”

Azərbaycan deyərək yaşadı, ürəyi can Azərbaycan deyərək dayandı.

Ustad Həsən Dəmirçinin ailəsi olaraq istər müalicə aldığı zaman xəstəxanaya gələnlər, istər o əziz insanın vəfatından sonra mərhumun dəfn və 3 mərasimində iştirak edənlər, həmçinin lövhə yazdıranlar və gül çələngi gətirənlər hamısı bu ağır itkidən dolayı bizim kədərimizə şərik oldular. Bu vasitə ilə hər kəsə öz minnətdarlığımızı bildirərək xalqımızın qarşısında baş əyirik”- deyə ustad Dəmirçinin ailə üzvlərinin paylaşdığı mesajda bildirilir.

İran rejimi dəfn mərasiminə qatılmaq istəyən fəallara təzyiq görtərmək, onlardan bir neçəsini yaxalamaq, həmçinin 3 mərasimi ilə bağlı hazırlanan bildiriş vərəqələrini zəbt etmək və mərasimin nəzərdə tutulan yerdə keçirilməsinə imkan verməmək kimi yollarla mərhumla bağlı keçirilən mərasimlərdə problem yaratmağa çalışdı, lakin bütün bunlara baxmayaraq ustad Həsən Dəmirçinin dəfn və 3 mərasimi azərbaycanlılar tərəfindən yüksək səviyyədə keçirildi.

Həsən Dəmirçi 1941-ci ildə Təbrizdə dünyaya göz açıb. O şair, yazıçı və musiqi ustadı kimi bütün ömrünü vətəni Azərbaycan, onun musiqisi və ictimai-siyasi məsələlərinə həsr etmişdir. Azərbaycan türk milləti bu xidmətlərinə görə ona “Həsən Azərbaycan” ləqəbi verib.

Mərhum Həsən Dərmirçi Azərbaycan türk millətinin demokratik və milli hüquqları uğrunda apardığı mədəni mübarizəyə görə dəfələrlə təhlükəsizlik qüvvələri tərəfindən saxlanılıb və müxtəlif təzyiqlərə məruz qalmışdır.

İyunun 24-də dünyasını dəyişən mərhum Həsən Dəmirçi vəfatından bir gün sonra Təbrizdə “Vadi rəhmət” qəbiristanlığında torpağa tapşırılıb.

N.S

GUNAZ.TV

SON XƏBƏRLƏR