Azərbaycan parlamentinin 100 illiyi qeyd olunub

SON XƏBƏRLƏR

Azərbaycan parlamentinin 100 illiyi qeyd olunub - VİDEO

2021.10.20, 07:36

Gunaz.tv

GünAz TV: Sentyabrın 21-də Milli Məclisdə Azərbaycan parlamentinin 100 illiyi münasibətilə təntənəli iclas keçirilib.

Xezerxeber.az-ın məlumatına görə, Azərbaycan Respublikasının Prezidenti İlham Əliyev və xaricdən dəvət olunmuş çoxsaylı qonaqlar iclasda iştirak ediblər.

Prezident İlham Əliyev çıxış edərək deyib ki, bu gün Azərbaycan uğurla inkişaf edir və bu inkişafda Azərbaycan parlamentinin xüsusi rolu var.

Prezident xatırladıb ki, əfsuslar olsun, Azərbaycan Xalq Cümhuriyyəti cəmi 23 ay yaşadı, süqut etdi və Azərbaycan dövlət müstəqilliyini itirdi. Bu, onu göstərir ki, müstəqilliyi qoruyub saxlamaq onu əldə etməkdən daha çətin işdir.

Milli Məclisdəki çıxışı zamanı Prezident İlham Əliyev bir sıra məsələlərə toxunub. Dövlət başçısı bildirib ki, Azərbaycana böyük həcmdə sərmayə qoyuluşunun təmin edilməsində Heydər Əliyevin müstəsna rolu var.

Prezident deyib ki, 24-cü ildönümünü qeyd etdiyimiz "Əsrin kontraktı" olmadan Azərbaycanın bugünkü sürətli inkişaf dinamikasını təsəvvür etmək mümkün deyil.

Prezident çıxışı zamanı Ermənistan-Azərbaycan, Dağlıq Qarabağ münaqişəsinə də toxunaraq bunu ən böyük ədalətsizlik adlandırıb: "Bütün ölkələr Azərbaycanın ərazi bütövlüyünü dəstəkləyir və Dağlıq Qarabağ Azərbaycanın ayrılmaz hissəsidir. Bu gün ondan çox ölkənin parlamenti Xocalı soyqırımını rəsmən tanıyıb".

Dövlət başçısı bildirib ki, bundan sonrakı dövrdə Ermənistanın yeni rəhbərliyi bu məsələ ilə bağlı öz siyasətində ciddi düzəlişlər etməlidir. Çünki bu gün Ermənistandan səslənən çox ziddiyyətli və bəzən cəfəng fikirlər münaqişənin həllinə yox, onun dərinləşməsinə xidmət göstərir: "Azərbaycan öz prinsipial mövqeyindən geri dönməyəcək. Onsuz da Ermənistan işğalçılıq siyasətinə görə böhran, tənəzzül içindədir. Rəsmi statistikaya görə, orada yoxsulluq 30 faizə, amma real vəziyyətdə 50 faizə çatır. Kütləvi işsizlik, depopulyasiya, insanların kütləvi şəkildə köçü baş verir. İqtisadi inkişaf üçün heç bir əsas yoxdur. Heç kim investisiya qoymaq istəmir, bazar məhduddur, xarici bazarlara çıxış yoxdur. Bu mövcud problemlər, üstəgəl işğalçılıq. Onların işğalçılıq siyasəti faktiki olaraq əvvəlki kriminal rejimin çökməsinə gətirib çıxardı. Amma biz görürük ki, indi yeni hökumət də eyni yolla getmək istəyir. Bu ağır, çətin vəziyyətdən xilas üçün Ermənistanın yeganə yolu var, o da bizim torpaqlarımızdan çıxmaqdır. Ondan sonra onların inkişafı üçün şərait yaradıla bilər. Əgər onlar işğalçılıq siyasətini davam etdirmək istəyirlərsə, bilməlidirlər ki, bunun axırı olmayacaq. Bunun axırı onlar üçün çox pis olacaq".

Ermənistan fərqli olaraq Azərbycan isə sürətlə inkişaf edib.

Prezident İlham Əliyevin sözlərinə görə, son 15 il ərzində iqtisadi baxımdan Azərbaycan qədər sürətlə inkişaf edən ikinci ölkə olmayıb. İqtisadiyyat 3,2 dəfə artıb və bu artım bu gün davam edir: "Təsadüfi deyil ki, cəmi 26 yaşı olan ölkəmiz Davos Dünya İqtisadi Forumunun iqtisadiyyatların rəqabətqabiliyyətlilik hesabatına görə, dünya miqyasında 35-ci yerdədir. Yenə də Davos Forumunun inkişaf edən ölkələr arasında inklüziv inkişaf indeksi üzrə hesablamalarına görə, Azərbaycan 3-cü yerdədir".

Dövlət başçısı ordu quruculuğundan da danışıb: "Paradlarda nümayiş etdirilən imkanlarımız hesab edirəm ki, çox təsirlidir. Bu gün beynəlxalq reytinqlərə görə, Azərbaycan Ordusu dünya miqyasında 50 ən güclü ordu sırasındadır və bu, reallıqdır".

Dövlət başçısı Azərbaycanın həyata keçirdiyi qlobal enerji və nəqliyyat layihələrindən də danışıb.

Prezident İlham Əliyev sonda iclas iştirakçıları ilə xatirə şəkli çəkdirib.

Xezerxeber.az mövzu ilə bağlı daha ətraflı videomaterialı təqdim edir:

https://www.youtube.com/watch?v=iVVrE-Lpsck

N.S