Pompeo: “İran xalqı deyir ki, ölkəyə hakim korrupsiya və 40 illik dini hakimiyyət artıq yetər”

SON XƏBƏRLƏR

Pompeo: “İran xalqı deyir ki, ölkəyə hakim korrupsiya və 40 illik dini hakimiyyət artıq yetər”

2021.10.20, 07:36

Gunaz.tv

GünazTV: ABŞ-ın dövlət katibi Mayk Pompeo dekabrın 9-da “Twitter” səhifəsində paylaşdığı bir yazıda İran xalqının korrupsiyaya və ölkəyə hakim ruhani oğru başçılarına qarşı apardığı dinc mübarizəsinə dəstək verib.

Pompeo deyib ki, iranlıların rifah və azadlıq uğrunda apardığı sivil mübarizədə Amerika İran xalqının yanındadır: “İran xalqı son etirazlarda açıq-aydın və şəffaf şəkildə öz sözünü dedi. Daha doğrusu, İran xalqı ruhanilərin son 40 ildəki korrupsiyasına və onların su-istifadəsinə yox deyərək, ölkə əhalisinin mənafe və maraqları əvəzinə xarici amillərin mənafeyinə üstünlük verilməsinin dayandırılmasını tələb etdi. Biz isə bir daha bildiririk ki, bu sivil mübarizədə Amerika İran xalqının yanındadır.

Bu gün İranda baş verənlər, İran xalqının onları azadlıqdan və iqtisadi inkişafdan məhrum edən mövcud rejimə qarşı mübarizəsidir. Bizim son həftələr şahidi olduğumuz budur ki, İran xalqı bütün bu xoşagəlməz halların dayandırılmasını tələb edir. İran xalqı deyir ki, oğru başçılarının 40 illik hökmranlığı və dini hakimiyyət artıq yetər” –deyə, Amerika Birləşmiş Ştatlarının dövlət katibi Mayk Pompeo bəyan edib.

Xatırladaq ki, noyabrın 15-dən başlayaraq, İranda hökumətin benzinin qiymətini üç dəfə artırmasına qarşı keçirilən kütləvi etirazlar və səsləndirilən şüarlar qısa zaman içində molla rejiminə qarşı yönəlib. Ölkənin 200-ə yaxın şəhərində keçirilən etirazlarda rejim qüvvələrinin dinc etirazçılara qarşı göstərdiyi misli görünməmiş vəhşilik və qəddarlıq dünya ictimaiyyətini şoka salıb. Belə ki, hökumət, “Sepah”, “Bəsic” və mülki geyimli təhlükəsizlik qüvvələrinin etirazçılara qarşı odlu silahlardan açdığı atəş nəticəsində 1000-ə yaxın insan qətlə yetirilib, 3700 aksiyaçı güllə yarası alıb, Tehranda və digər şəhərlərdə 8 mindən çox etirazçı polis və mülki geyimli təhlükəsizlik qüvvələri tərəfindən həbs edilib.

Rejim qüvvələrinin odlu silahlardan açdığı atəş nəticəsində qətlə yetirilənlərdən 18-i azyaşlı uşaqlar və yeniyetmələrdir.

Etirazlar zamanı həmçinin ən azı 7 “Sepah” və “Bəsic” muzdlusu, ən azı 3 axund həlak olub, cəhalət, xurafat və fəsad mərkəzi sayılan 15-ə yaxın dini mədrəsə (mollaxana) etirazçılar tərəfindən yandırılıb. Bundan başqa, qəzəbli etirazçılar hakimiyyətə bağlı bir axundu ələ keçirdikdən sonra onun cinsi orqanını kəsib atıblar.

Molla rejiminin repressiya maşınını işə salmasına baxmayaraq, ölkədə yaşanan inqilabi vəziyyət və iri şəhərlərdə elan olunmamış fövqəladə vəziyyət rejimi davam edir.

A.M

GUNAZ.TV

SON XƏBƏRLƏR