“Arayik zərəsizləşdirilməsə, Qarabağda arzuedilməz vəziyyət yarana bilər”

SON XƏBƏRLƏR

“Arayik zərəsizləşdirilməsə, Qarabağda arzuedilməz vəziyyət yarana bilər” - Millət vəkili

2022.02.18, 09:35

Gunaz.tv

Bu barədə Azərbaycan Respublikasının Baş Prokurorluğu açıqlama yayıb.

Məlumata görə, Arutyunyan 2020-ci ilin oktyabr ayında Gəncə şəhərində dinc əhaliyə qarşı törədilən 4 terror hücumunda təqsirləndirilir.

Milli Məclisin Müdafiə, təhlükəsizlik və korrupsiya ilə mübarizə komitəsinin sədr müavini Hikmət Babaoğlu Modern.az-a bildirib ki, Azərbaycana qarşı cinayət törətmiş hər bir şəxs mütləq qanun qarşısında cavab verəcək:

“Hazırda postmüharibə dövrünün yeni mərhələsinə qədəm qoymaqdayıq. Birinci mərhələ yaranmış yeni reallığın dünya tərəfindən qəbul edilməsi mərhələsi kimi yadda qaldısa, ikinci, yeni mərhələ beynəlxalq hüquq və Azərbaycan qanunları qarşısında onu pozanların cəzalandırılması mərhələsi olacaq.

Əks təqdirdə, sülhdən və inteqrasiyadan danışmaq mümkün ola bilməz. Azərbaycan tərəfi hərbi cinayətkarların siyahısını müəyyənləşdirib, xüsusi ittiham qaydasında iddia qaldırıb və onların həbs edilməsi ilə bağlı qərar qəbul edib.

Eyni zamanda, beynəlxalq axtarışla bağlı müvafiq qurumlara müraciət edilib. Belə cinayətkarlardan biri də Arayik Arutyunyandır.

Onun hərbi cinayətkar və separatçı olması qanunla müəyyən edilib, hərəkətləri hüquqi məsuliyyət yaradır. Gəncə şəhərinə atılan raketlərlə bağlı əmrin bu terrorçu tərəfindən verildiyini də özü etiraf edib.

Bu günlərdə Baş Prokurorluğun rəsmisi də qısa zamanda həmin şəxsin tezliklə məsuliyyətə cəlb ediləcəyini bildirməsi belə qənaət formalaşdırır ki, artıq bu istiqamətdə konkret nəticələr əldə etməyə yaxınıq. Ümid edirik ki, ən qısa zamanda bu həbs gerçəkləşdiriləcək və ədalət öz yerini tutacaq”.

Azərbaycan ərazisində təqribən 25 minlik bir erməni icmasının yaşadığını diqqətə çatdıran deputat sülhməramlıların müvəqqəti nəzarətində olan ərazilərdəki fəaliyyətinə toxunub.

H. Babaoğlu bildirib ki, üçtərəfli bəyannamədə əldə edilmiş razılaşmaya görə, sülhməramlıların 5 illik fəaliyyəti dövründə bütün qanunsuz silahlı quldur dəstələri Azərbaycan ərazisini tərk etməli və Qarabağdakı erməni icmasının Azərbaycan cəmiyyətinə inteqrasiyası istiqamətində addımlar atılmalıdır:

“Artıq bir il yarımdan çox vaxt keçib, ancaq bu istiqamətdə hələ də konkret nəticələr əldə etmək üçün addımlar atılmayıb.

Belə olan halda açıq şəkildə cinayət törətmiş arutyunyanların sərbəst gəzməsi digər icma üzvlərini də cinayət və təxribatlara sövq edir. Ona görə də gələcək birgəyaşayışa doğru addımların atılması üçün ilk növbədə Arayik Arutyunyan həbs edilməklə zərəsizləşdirilməlidir.

Əks təqdirdə, sülhməramlıların getdikcə azalan fəaliyyəti müddətində birgəyaşayış üçün heç bir uğurlu addım atmaq mümkün olmayacaq. Belə nəticə isə arzuedilməz vəziyyət yarada bilər”. (modern.az)

Ayxan