Gölün quruması bölgənin fauna və florasının məhvinə gətirib çıxaracaq.

Ərazidə küləyin yaradacağı duz fırtınaları bölgəni cəhənnəmə çevirəcək, yüzlərlə kilometr uzaqda belə dəhşətli xəstəliklər baş qaldıracaq. Urmu gölü ilə bağlı çalınan həyəcan təbilinə baxmayaraq İran hakimiyyəti su hövzəsinin bərpası ilə bağlı əməli addımlar atmır. 

Əksinə, molla rejimi ekoloji fəlakət nəticəsində türklərin bölgədən köçüb fars bölgələrinə axınını stimullaşdırır. Güney Azərbaycanın aydınları, milli qurumları və fəalları dəfələrlə hakimiyyəti Urmunu xilas etməyə səsləsələr də, molla iqtidarı bu tələbləri görməzdən gəlir.

Milli qüvvələr öncədən elan olunduğu kimi ötən şənbə, iyulun 16-da Güney Azərbaycanın müxtəlif şəhərlərində Urmu gölünün qurudulmasına etiraz aksiyası təşkil etmişdi.

Urmu, Təbriz, Ərdəbil, Sulduz, Qoşaçay şəhərlərində etiraz eyləmləri baş tutub. İran hakimiyyəti öncədən təhlükəsizlik tədbirləri görmüş, aksiya planlaşdırılan bölgələrə xüsusi təyinatlı qüvvələr cəmləşdirmişdi.
Bütün təhlükəsizlik tədbirlərinə baxmayaraq şəhərin bir neçə yerində aksiyalar keçirilib.

Hökumətin Urmu gölü ilə bağlı siyasətinə etiraz edən narazılar küçələrə çıxıb, milli məzmunlu şüarlar səsləndiriblər. 

Qeyd edək ki, eyləmə hazırlıq ötən həftədən başlayıb.
Hakimiyyət orqanları eyləmin təşkilatçılarına və milli fəallara qarşı təzyiqləri gücləndirsə də, insanlar küçələrə çıxaraq Urmu gölünün qurudulmasına etiraz səslərini ucaldıblar.

Urmuda keçirilən aksiyalarda  “Urmu gölü can verir, İran onun qətlinə fərman verir”, “Qalx ayağa Azərbaycan”, “Urmu gölü susuzdur, Azərbaycan oyanmasa uduzdu” şüarları səslənib. 

Hökumət məmurları etirazçıların şəhər mərkəzində bir yerə toplaşmalarının qarşısını almağa çalışıb.

Ərdəbildə internet və telefon xidmətləri məhdudlaşdırılıb. Güneydən verilən məlumata görə, günorta saatlarından başlayaraq Ərdəbil şəhərinin valilik binası həyətinə çox sayda texnika və xüsusi təyinatlı qüvvələr toplanıb.

İran hakimiyyəti Güney Azərbaycan türklərinin etiraz aksiyasını bu dəfə də zorakılıqla yatırmağa çalışıb.

Sözügedən şəhərlərdə onlarla fəal saxlanılıb, onlar barədə müvəqqəti həbs qərarı çıxarılıb. İran rejiminin bütün zorakılıqlarına baxmayaraq Güney Azərbaycan şəhərlərində Urmu gölünə dəstək aksiyaları baş tutub. 

Etiraz aksiyaları Urmu gölü ilə bağlı fəlakətli durumu ölkə və dünya ictimaiyyətinin diqqət mərkəzinə gətirdi.

Milli hərəkat 16 iyul aksiyaları ilə İran hakimiyyətinə mesaj verdi: Azərbaycan xalqı Urmu gölü ilə ilə bağlı hiyəgər planlardan xəbərdardır. Azərbaycanlılar gölün göz önündə qurudulmasına, bölgənin türküzləşməsinə laqeyd qalmayacaq.

Elman Cəfərli