Contact Us

SON XƏBƏRLƏR

Qaqauz Yeri yeni başqanını seçdi

2023.05.15, 10:37
Qaqauz Yeri yeni başqanını seçdi

Gunaz.tv

Modern.az-ın məlumatına görə, müxalifətdə olan Şor partiyasının namizədi Yevgeni Qutsul qalib gəlib.

32 yaşlı Qutsul 52%, onun rəqibi, Moldova Sosialist Partiyasının namizədi Qriqori Uzun 48% səs qazanıb.

O, Kişinyov qarşısında Qaqauzun xüsusi statusunu müdafiə edəcəyini, Rusiya Federasiyası ilə ticarət-iqtisadi əlaqələrin bərpasını tələb edəcəyini və MDB ilə müqavilələrin denonsasiyasını dayandıracağını vəd edib.

Qeyd edək ki, Qaqauz eli Moldovanın cənubunda yerləşir.

Qaqauzlar türk mənşəli xalqdır. Bu adın bütün oğuzların atası olaraq qəbul edilən Oğuz Xaqanın – “Göy  Oğuz” adından yarandığı ehtimal olunur.

Araşdırmalara  görə, qaqauzlar bir xalq kimi təxminən XIII əsrdə indiki Bolqarıstanın şimalındakı Dobruca bölgəsində formalaşıb. 

Onların Balkanlarda yaşamış türk tayfalarından peçeneqlər, kumanlar, qıpçaqlar və hunlarla qan qohumluğu var.    

Qaqauzlar dini etiqadlarına görə xristiandırlar. 

Belə ki,  XIII-XIV əsrlərdə qaqauz türkləri arasında xristianlıq geniş yayılmağa başlayıb və 1400-cü ildə, Osmanlı imperiyası Dobruca knyazlığını ələ keçirəndə artıq qaqauzların xristianlaşması prosesi başa çatmışdı.

Məlumdur ki, Osmanlı sultanları fəth etdikləri torpaqlarda dini zəmində ayrı-seçkillik siyasəti aparmayıblar. 

Onlar qaqauzların da islam dinini qəbul etmələri üçün heç bir cəhd göstərməyiblər.

Hazırda Avropada, təxminən, 300 minə yaxın qaqauz türkünün yaşadığı deyilir. Lakin onların hamısı Qaqauziyada yaşamır. Ukraynada da tarixən minlərlə qaqauz ailələri məskunlaşıb. 

Bundan başqa, qaqauzların Rusiya, Yunanıstan, Bolqarıstan və Türkiyədə yaşadıqları bəllidir.

Qeyd edək ki, Qaqauz Yerinin hazırkı başqanı İrina Vlax idi.

Ayxan

Açar Sözlər :

OXŞAR XƏBƏLƏR

SEÇİLMİŞ XƏBƏRLƏR

Çox oxunanlar