26 amerikalı senator İranla razılaşmanı pislədi

SON XƏBƏRLƏR

26 amerikalı senator İranla razılaşmanı pislədi

2023.08.19, 11:00

26 amerikalı senator Bayden hökumətinin İranla razılaşmasınını pisləyən məktub yazıb.

Gunaz.tv

Məktub Cənubi Karolinadan olan respublikaçı Tim Skott və Aydahodan olan respublikaçı Cim Beardın təşəbbüsü ilə yazılıb.

Onlar ABŞ Xarici İşlər Nazirliyi və maliyyə Nazirliyinə ünvanladıqları məktubda ABŞ hakimiyyətinin İrana məxsus dondurulmuş pulları sərbəst buraxılması barədə razılaşmasını Tehran hakimiyyətinə bac vermək kimi dəyərləndiriblər.

Onlar vurğulayıblar ki, Bayden adminstriyasının bu qərarı İran rejiminin bütün Yaxın Şərqdə sabitliyi pozan fəaliyyətlərini artırmağa imkan verir.

Senatorlar məktublarında 19 iyul 2022-ci ildə verilmiş 14078 saylı İcra Sərəncamını xatırladıblar.

Ağ Evin bu sərəncamında terror təşkilatları və digər zərərli qruplar tərəfindən maliyyə və siyasi maraqlar naminə girov götürülməsinin ABŞ-dan imtiyazlar almaq üçün ABŞ vətəndaşlarının qanunsuz həbsinin siyasi sistemin bütövlüyünə və dövlətin təhlükəsizliyinə xələl gətirdiyi vurğulanır.

"İran rejimi üçün bu qədər əhəmiyyətli məbləğin sərbəst buraxılması bu iddia ilə tamamilə ziddiyyət təşkil edir, maliyyə və ya siyasi mənfəət üçün daha çox girov götürməyə təşviq edəcək",- məktubda bildirilir.

Qeyd edək ki, İranla ABŞ arasında baş tutan razılaşmaya əsasən, İranda saxlanılan 5 İran əsilli amerikalı ev dustaqlığına buraxılıb və İranın dondurulmuş vəsaitinin humanitar sahələrdə istifadəsi üçün razılıq verilib.

ABŞ-ın xarici işlər naziri Entoni Blinkin isə bu razılaşmanın İrana qarşı tətbiq edilən sanksiyalarla heç bir əlaqəsinin olmadığını və sanksiyaların yumuşaldılmayacağını deyib.

Razılaşma xaricdə yaşayan iranlı müxaliflər tərəfindən də pislənilib. Onlar ABŞ hökumətinin bu addımının Tehranı başqa şəxsləri də girov götürmək üçün cəsarətləndirəcəyini deyiblər.

Timur

GUNAZ.TV

SON XƏBƏRLƏR