Azərbaycan maralları Kirmana sürgün edilir

SON XƏBƏRLƏR

Azərbaycan maralları Kirmana sürgün edilir

2023.08.29, 13:13

Urmu gölünün quruması və ekosistemin dəyişməsindən sonra gölün adalarında yaşayan sarı maralların Kirmana aparılması prosesinə başlanılıb.

Gunaz.tv

Bu barədə Kirman əyalətinin Ətraf Mühitin Mühafizəsi İdarəsinin başçısı Mustafa Niktəb məlumat yayıb.

O bildirib ki, Kirman indiyə kimi bu növün yaşayış yeri olmayıb:

“Bu səbəbdən əyalətdə sarı maralların yaşayış yerini müəyyən etmək üçün xüsusi araşdırmalar və işlər aparılır. Azərbaycan marallarının Kirmana köçürülməsi Urmu gölündə baş verən dəyişikliklərlə, ekoloji problemlə bağlıdır”.

Urmunun sarı marallarının Kirmana aparılması barədə açıqlama güneyli sosial media istifadəçiləri tərəfindən narahatlıqla qarşılanıb. Onlar bunun Urmiya gölünün bərpa edilməyəcəyinə dair mesaj olduğunu bildiriblər.

Bundan əvvəl Urmu gölü hövzəsində, xüsusən Aşk və Kəbudan adalarında nadir maral növlərindən olan sarı maralın sayı minlərlə olub. Son illər ekoloji fəlakətin genişlənməsi, Urmu gölünün suyunun quruması və ekosistemin dəyişməsi nəticəsində maralların sayı azalaraq 60-a çatıb.

Qeyd edək ki,, 1946-cı ildə Cənubi Azərbaycan Milli Hökuməti devriləndən sonra çox sayda azərbaycanlı Kirmana sürgün edilib, minlərlə tarixi və incəsənət əsəri Kirman muzeylərinə daşınıb.

Timur

GUNAZ.TV

SON XƏBƏRLƏR