AŞ PA ermənipərəst mövqe sərgilədi "Ermənistanın səsvermə hüququndan məhrum edilməməsində erməni lobii təşkilatlarının böyük rolu olub" Avropa Şurası Parlament Assambleyası (AŞ PA) Ermənistanı səsvermə hüququndan məhrum etməyib. AŞ PA-nın qış sessiyası çərçivəsində iki gün öncə keçirilən toplantıda Ermənistanla bağlı qətnamə səsverməyə çıxarılıb. AŞ PA üzvlərindən 141 deputat qətnamənin lehinə, 3 deputat əleyhinə səs verib, 5 deputat isə bitərəf qalıb. İlkin qətnamə layihəsində Ermənistanın səsvermə hüququndan məhrum edilməsi nəzərdə tutulsa da, AŞ PA Monitorinq Komitəsi qətnaməyə dəyişiklik edib. Dəyişikliyə əsasən, Ermənistan AŞ PA-da səsvermə hüququndan məhrum edilmir, lakin ölkədə demokratikləşmə prosesində ciddi irəliləyişlər olmasa, qurum aprel sessiyasında bu məsələyə yenidən qayıtmaq hüququnu özündə saxlayır. Tural Qətnamədə Ermənistanda prezident seçkilərindən sonra etiraz aksiyalarında iştirak edən şəxslərin azadlıqdan məhrum edilməsindən narahatlıq ifadə olunur. AŞ PA həmin şəxslərin siyasi motivlərlə həbs olunduğunu bəyan edib. Qurum Ermənistan prezidentinin AŞ insan hüquqları komissarının təklifini nəzərə alaraq 1-2 mart hadisələrini təhqiq etmək üçün ekspertlər qrupu yaradılmasına sərəncam verməsini müsbət qiymətləndirib. Sənəddə qeyd olunur ki, bu qrupun fəaliyyətinin ictimaiyyətdən gizli saxlanması görülən işlərə xalqın inamını azaldır. AŞ PA bütün siyasi qüvvələri ekspertlər qrupunun işini siyasiləşdirməkdən çəkinməyə, hakimiyyəti isə bütün dövlət orqanlarının təhqiqat qrupu ilə əməkdaşlıq etməsi üçün şərait yaratmağa çağırıb. Qurum həmçinin 1-2 mart hadisələri zamanı həbs olunan şəxslərin dərhal azadlığa buraxılması ilə bağlı AŞ PA-nın çağırışlarına məhəl qoyulmamasından təəssüfləndiyini də bildirib. Sənəddə göstərilir ki, həmin hadisələr zamanı həbs olunan şəxslərlə bağlı aparılan istintaq əsasən polislərin ifadələrinə əsaslanıb. Məsələ ilə bağlı fikirlərini öyrəndiyimiz Qarabağ Azadlıq Təşkilatının (QAT) sədri Akif Nağı dedi ki, digər beynəlxalq təşkilatlar kimi AŞ PA da həmişə Ermənistana yumşaq münasibət göstərir. Onun sözlərinə görə, sözügedən qurum Ermənistanda demokratiya və insan haqları ilə bağlı durumu necə dəyərləndirdisə, İrəvanın Azərbaycan torpaqlarını işğal etməsinə də o cür qiymət verir: "Ümumiyyətlə, biz dəfələrlə belə halların şahidi olmuşuq ki, Ermənistanda baş verən neqativ hadisələrə, bu ölkənin işğalçılıq siyasətinə Avropa Şurası və digər nüfuzlu təşkilatlar ikili standartlarla yanaşırlar. Yəni demokratiya və insan hüquqlarıyla bağlı eyni hərəkətə görə Azərbaycana qarşı çox kəskin mövqe tutulur, amma Ermənistana həmişə güzəştə gedirlər". QAT sədri deyir ki, AŞ PA-nın bu qətnaməsində də ya xristian təəssübkeşliyi, ya da böyük dövlətlərin təsiri öz rolunu oynayıb. Çünki Qarabağ münaqişəsinin gedişində də baş verən proseslər onu göstərirdi ki, böyük dövlətlər və beynəlxalq təşkilatlar Ermənistanın tərəfindədirlər və bu ölkənin mövqeyini müdafiə edirlər. Akif Nağıya görə, beynəlxalq təşkilatların əksəriyyəti həmişə çalışıblar ki, Azərbaycan Ermənistanın tələbləri qarşısında güzəştə getsin. Bundan əlavə AŞ PA-nın İrəvanda baş verən mart hadisələrinin müqabilində bədnam qonşumuza mülayim münasibət göstərilməsi, erməniləri Qarabağ məsələsinin onların xeyrinə həll olunmasında da arxayın salır: "Hesab edirəm ki, AŞ PA-nın qərarı təkcə bu qurumun deyil, həm də beynəlxalq təşkilatların, ümumilikdə, İrəvanla rəsmi Bakı arasında olan münasibətlərə yanaşmasını göstərdi. Ona görə də bu təşkilatlardan Dağlıq Qarabağ münaqişəsi ilə bağlı ədələtli mövqe gözləməyə dəyməz". Akif Nağı onu da vurğuladı ki, indiki halda AŞ PA-nın Ermənistanla bağlı anormal qərarlar verməsinin müxtəlif səbəbləri var və bu səbəblərdən biri də böyük ölkələrin ermənilərin maraqlarını öndə tutmasıdır. ABŞ AŞ PA-nın üzvü deyil. Amma erməni lobbisinin güclü olduğu bu ölkənin Avropa Şurasına təsir rıçaqları var. Avropa dövlətlərinin böyük əksəriyyəti də birmənalı şəkildə işğalçı ölkəni və bu ölkədəki siyasi hakimiyyəti müdafiə edirlər: "Ermənistanın səsvermə hüququnun əlindən alınmaması AŞ PA-nın ermənipərəst mövqe sərgiləməsinin sübutudur. Sabah Azərbaycan işğal olunmuş ərazilərində antiterror əməliyyatları aparsa, AŞ PA bu mövqeyə oxşar bir münasibət göstərəcək və Ermənistanın müdafiəsinə qalxacaq".