"Cəbhə xəttində öldürülən erməninin mülki şəxs olması ilə bağlı Ermənistanın məlumatı əsassızdır" Azərbaycanın Müdafiə Nazirliyinin mətbuat xidmətindən ANS TV-yə verilən məlumata görə, Bad Tedovasyanın əynində hərbi forma olub və o, döyüş hazırlığı vəziyyətində silahlı olub Yanvarın 26-da Ermənistan silahlı qüvvələrinin Ağdam istiqamətində Azərbaycan mövqelərinə doğru irəliləməyə cəhd edərkən öldürülən erməni Bad Tedovasyanın mülki şəxs olması ilə bağlı Ermənistan tərəfinin yaydığı məlumat tamamilə əsassızdır. Azərbaycanın Müdafiə Nazirliyinin mətbuat xidmətindən ANS TV-yə verilən məlumata görə, erməni tərəfinin açıqlamasının özü bunu sübut edir: «Belə ki, Ermənistan Müdafiə Nazirliyinin yaydığı məlumatda həmin şəxsin psixi xəstə və sərxoş olması göstərilib. Halbuki onun əynində hərbi forma olub və Bad Tedovasyan döyüş hazırlığı vəziyyətində silahlı olub». Azərbaycanın Müdafiə Nazirliyi bəyan edir ki, mülki şəxsin iki saat ərzində atışmada iştirakı və Milli Ordumuzun mövqelərinə tərəf hücum etməsi qeyri-mümkündür. Bu gün Müdafiə Nazirliyi faktı jurnalistlərə əyani olaraq nümayiş etdirib. Hərbi geyimdə olan erməni kəşfiyyatıçısının görüntülərinin çəkilməsinə icazə verilib. O, hərbi formada olub. Hazırda ANS PRESS-in bölgə müxbiri də hadisənin baş verdiyi Ağdam rayonundadır. Onun verdiyi məlumata görə, İki saata qədər davam edən döyüş zamanı Ermənistan silahlı qüvvələrinin üç hərbiçisi məhv edilib. Dörd nəfər isə yaralanıb. Ölənlərdən ikisinin meyidini erməni tərəfi götürə bilib. "Bir meyit isə Azərbaycan tərəfdə qalıb. Ermənistan tərəfinin həmin şəxsin mülki şəxs olması barədə yaydığı məlumatlar həqiqətə uyğun deyil. Həmin əsgər hərbi geyimdə olub. Bunu gördük. «AK 74» markalı avtomat silahı ilə birlikdə həmin əsgərin meyidi Azərbaycan tərəfində qalıb". Xatırladaq ki, Ermənistanın Müdafiə Nazirliyi bu gün, cəbhə xəttinin Ağdam istiqamətində erməni hərbçisinin və bir mülki şəxsin ölümüylə bağlı məlumat yayıb. News-Armeniya xəbər saytı Ermənistanın Müdafiə Nazirliyinə istinadən xəbər verib ki, yanvarın 26-sı axşam saat 17.30 radələrində erməni hərbçiləri Azərbaycan Ordusunun mövqelərinə doğru hərəkət edərkən milli ordunun əsgərləri onlara atəş açıb. Nəticədə 1983-cü il təvəllüdlü mülki şəxs Bad Tedovasyan və 26 yaşlı sıravi Arkadi Akopyan həlak olublar. Ermənistan Müdafiə Nazirliyi meyidlərdən birinin Azərbaycan Ordusunun nəzarətindəki ərazidə qaldığını da bildirib. Ermənistan Müdafiə Nazirliyi mülki şəxsin ruhi xəstə olduğunu və hadisə baş verərkən sərxoş olduğunu iddia edib. Azərbaycan Müdafiə Nazirliyinin bir gün öncə yaydığı məlumata görə, yanvarın 26-sı saat 19 radələrində Ermənistan ordusu Ağdamın Cəvahirli kəndi istiqamətində Azərbaycan Silahlı Qüvvələrinin mövqelərinə doğru hücum edib. Azərbaycan Müdafiə Nazirliyinin mətbuat xidmətinin rəisi Eldar Sabiroğlunun sözlərinə görə, düşmən ilk hərəkətindən artıq nəzarət altına götürülüb. «Onların hər bir vəziyyəti izlənilib. Düşmən bir az da yaxına buraxıldıqdan sonra Azərbaycan əsgəri atəşə başlayıb. Bir saata yaxın gedən döyüş nəticəsində düşmən üç itki və bir necə yaralı verərək geri çəkilib. Azərbaycan Ordusu heç bir itkiyə məruz qalmayıb». E. Sabiroğlunun sözlərinə görə, hazırda təmas xəttinin yaxınlığında düşmənin bir meyiti qalıb. Qalan meyit və yaralıları ermənilər apara biliblər. /ANSPRESS/