BAXÇALI ƏRDOĞANI “ERGENEKON”la BAĞLI SƏRT TƏNQİD ETDİ Adı bu işdə çəkilən keçmiş Baş Qərargah rəisi İsmayıl Haqqı Qaradayı İlkər Başbuğla görüşdü; CHP isə prokurordan şikayət etdi Adı son günlər AKP hökumətinə bağlı media tərəfindən “Ergenekon”da hallandırılan keçmiş Baş Qərargah rəisi İsmayıl Haqqı Qaradayı dünən hazırda bu vəzifəni tutan ordu generalı İlkər Başbuğla görüşüb. Görüş Türkiyə Silahlı Qüvvələri Baş Qərargahının binasında olub. Qərargahdan verilən qısa rəsmi açıqlamada bildirilir ki, İ.H.Qaradayı İ.Başbuğa vəzifəsi ilə bağlı xeyir-dua verib, həmçinin gündəmdə olan məsələlər müzakirə olunub. İ.H.Qaradayı Türkiyədə siyasi islamçıların əl-ayağını yığışdırmış “28 fevral mərhələsi” deyilən prosesdə aparıcı sima olub. Bu günlərdə “Ergenekon”u ifşa edən adam kimi təqdim edilən, ancaq hökumətin adamı kimi tanınan Tuncay Güney TRT-yə müsahibəsi zamanı İ.H.Qaradayının da bu gizli quruma mənsub olduğunu iddia edib. Mətbuatda isə keçmiş Baş Qərargah rəisinin də “Ergenekon”la bağlı həbs edilə biləcəyi, onun təşkilatda “1 nömrəli” olduğu haqda iddialar yer alıb. Bu baxımdan İ.H.Qaradayı ilə İ.Başbuğ arasındakı görüş maraqla izlənilirdi. Ana müxalifət partiyası Cümhuriyyət Xalq Partiyası (CHP) isə “Ergenekon” işini aparan prokurorlardan Hakimlər və Prokurorlar Yüksək Şurasına şikayət verib. CHP millət vəkili Atilla Kart tərəfindən verilən şikayətdə deyilir ki, ictimaiyyətdə “Ergenekon” istintaqı kimi bilinən işin istintaqına rəhbərlik edən prokuror Zəkəriyyə Öz və digər prokurorlar proses zamanı şəxsi qərəz hisslərinə qapılıb, səlahiyyətlərindən sui-istifadə edib, istintaqın gizliliyi prinsipini dəfələrlə kobud şəkildə pozublar. Bu baxımdan CHP Zəkəriyyə Öz və digər prokurorlar haqqında qanunlara müvafiq şəkildə araşdırma aparılmasını yüksək şuradan tələb edir. “Ergenekon” məsələsində nisbətən yumşaq və ehtiyatlı mövqe tutan Milliyətçi Hərəkat Partiyası (MHP) da mövqeyini sərtləşdirib. Partiyanın başqanı Dövlət Baxçalı dünənki çıxışında AKP hökumətinin kürd dilində telekanal açmasını və Tuncay Güney kimi qaranlıq imicə malik birinin TRT ekranlarına çıxarılmasını sərt tənqid edib. O, deyib ki, AKP iqtidarı Türkiyəni uçurumun kənarına gətirib. MHP liderinin sözlərinə görə, “Ergenekon” işi narahatlıq doğuran səviyyəyə çatıb, işlə bağlı sənədlər kənar şəxslərin əlinə keçərək yayınlanıb. Bu iş təşkil olunmuş səviyyədə edilir və məqsəd istintaqı yönləndirməkdir: “İş o yerə çatıb ki, dövlətin kanalı TRT kim olduğu belə bilinməyən adamı ekranlara çıxararaq ondan saatlarla müsahibə götürüb, bununla da cəmiyyətə fitnə toxumları səpib”. D.Baxçalı baş nazir Rəcəb Tayyib Ərdoğanın son çıxışlarının birində “ölkə içində və xaricində ”mən türkəm" deyib sərbəst şəkildə dolaşa bildiyi" haqda sözlərinə cavab olaraq deyib ki, onun türklük haqda danışmağa haqqı yoxdur: “Haqqı olmadığı halda türklükdən danışaraq bu məsələdəki ayıblarını ört-basdır etməyə çalışan Ərdoğanın millətin vicdanında açdığı yara heç vaxt getməyəcək”. CHP başqanı Dəniz Baykal da partiyasının parlament qrupu qarşısında dünənki çıxışında hökuməti “Ergenekon” işi ilə bağlı kəskin tənqid edib. O, deyib ki, davamlı olaraq bu iş çərçivəsində istintaqın gizliliyi və şəxsin günahsızlıq prezumpsiyası pozulur, prezident və baş nazir bu işin arxasından çox şeylərin çıxacağını deyir, ardınca iqtidar mətbuatı günahı sübut olunmayan insanları günahkar çıxararaq onlar barəsində ən müxtəlif iddialar ortaya atır. D.Baykal “Ergenekon” işinə görə 11 ay həbsdə qalan jurnalist Vedat Yenererin bu iş üzrə məhkəmə prosesinin davam etdiyi Silivri həbsxanasında onları bir qab şorbaya görə yalvarmağa məcbur etmələri haqda dediklərinə də münasibətini açıqlayıb: “Baxın, Obama gəldi, ABŞ Quantanamonu bağlayır. Amma Silivri həsbxanasının AKP-nin Quantanamosuna çevrilməsinə yol verilməməlidir. Nəyə görə indiyədək istintaqın gizliliyini pozanlar haqda heç bir tədbir görülmür? Dövlətin heç bir qurumunun təsdiqləmədiyi halda ”Ergenekon" adlı təşkilatın varlığını kim sübut edib? Sübut olunmayıbsa, bu ad niyə istintaq sənədlərində göstərilir?"